Александар Бајдевски, веќе екс заменик-министер за информатичко општество и администрација, денеска, во емисијата „Стадион“ на Канал 77 истакна дека неговата кандидатура за претседател на СДСМ е мотивирана од искрени и чесни намери за подобра иднина на партијата.
Како што кажа тој, СДСМ мора да ја врати автентичната идеологија, бидејќи само на тој начин може да се поврати сега веќе загубената доверба кај граѓаните и симпатизерите, но не со зборови, туку со нови промени, реформи и пред сѐ дела.
- Секој член е промената, така се вика мојата програма и доколку ја добијам довербата ќе се водам по овој принцип и метод на работа. Од изборите ги воочив грешките, па токму тие и моето претходно искуство во партијата ме мотивираа да се кандидирам, а со цел да донесам нова енергија и прогрес во СДСМ. Во оваа партија има демократски чин за избор на нов претседател, нема фаворити и сите кандидати ќе имаат рамноправна битка, не е точна фаворитската улога на Венко Филипче, вели Бајдевски.
Според него, промените мора да почнат внатре во партијата, а потоа да бидат претставени во јавноста.
„Никој не се плаши од дебати, промените мора да почнат внатре меѓу раководството и сите органи на партијата. Сметам дека на овој начин може да бидеме по продуктивни за скенирање на грешките, донесување на клучни одлуки за позитивни промени и целосна идеолошка промена, односно враќање на нашата автентичност, која заради политиките во минатото очигледно ја загубивме, а со неа и нашите гласачи“, потенцира Бајдевски.
Целата емисија на „Стадион“ може да ја проследите на линкот подолу.