Во последно време соло патувањето станува сè попопуларно и многу луѓе излегуваат од својата комфорна зона и одлучуваат сами да истражуваат други земји и култури, пренесува индекс.хр.
Познатите пребарувачи за патувања Kayak и OpenTable ги анализираа градовите ширум светот врз основа на најголем број индивидуални пребарувања за патувања, а потоа анализираа податоци како што се безбедноста, достапноста, рејтингот на хотелите и културното богатство. Конечно, беше спроведена и онлајн анкета за да се утврди колку градовите се пријателски за соло патниците.
Ви ги пренесуваме нивните резултати за топ 10 соло дестинации за патување низ светот.
Берлин, Германија
Првото место на листата го зазеде германската престолнина Берлин. Без разлика дали сакате да ја истражувате историјата на градот и да ги видите остатоците од Берлинскиот ѕид или да ја поминете ноќта забавувајќи се во ноќните клубови, Берлин на соло патниците им нуди можност да искусат град кој е топол и динамичен.
Ванкувер, Канада
На второ место е Ванкувер, Канада, град кој според истражувањата претставува рамнотежа на урбана софистицираност и природна убавина. Познат по својата безбедност и неверојатните погледи, Ванкувер е идеален за сите оние кои подеднакво уживаат во метежот и вревата на градот и природата.
Монтреал, Канада
Монтреал, уште еден канадски град, го освои третото место. Град на фестивали, храна и култура, Монтреал нуди возбудливо културно искуство со европски шмек. Покрај тоа, тој е високо оценет за безбедност и достапност, што го прави одличен избор за соло патници.
Доколку сакате да останете само во Европа, покрај Берлин, на листата има уште четири европски градови. Париз, Милано и Даблин го зазедоа четвртото, петтото и шестото место на оваа листа. Главниот град на Обединетото Кралство, Лондон е на последното место.
