Дарко Андонов a.k.a. ДААН вчера на неговиот YouTube канал ја промовираше неговата најнова музичка нумера “Со кого заспиваш”. Првичните реакции од страна на колегите и на неговите поддржувачи се доста позитивни и, како што вели, се надева песната и видеото да поминат добро и кај публиката.
-Псевдонимот го користам како уметничко име од враќањето на музичката сцена во 2022 година, како што знам често да кажам мојот нов музички почеток, а истовремено и назив на моето музичко студио „DAAN Music production“, во кое работам и творам како артист, композитор, текстописец, аранжер и сертифициран Cubase продуцент, вели Дарко и додава:
-Оваа песна ја работевме заедно со мојот соработник и пријател Кире Јакимов, кој воедно е и автор на музиката и текстот, додека аранжманот на песната е мој. Миксинг и мастеринг исто така работеше Кире Јакимов за што сум му многу благодарен, бидејќи ретко кој на овие простори може да извади толку добра продукција, песната сонично звучи стварно одлично. Честопати знам да искоментирам и да го наречам Мастер, бидејќи нависнина финалниот продукт секогаш звучи феноменално, вели Дарко.
Интересно за оваа песна е што била готова уште есента 2022 година, меѓутоа од најразлични причини, проблеми и слично некако се пролангирала и после неколку измени и преснимување го добила финалниот звук, а тоа по мислење на Дарко е подобро од првичната верзија.
-За видео записот, целта беше да се долови самата порака од текстот на песната, односно да се отслика приказната во видео кои ќе одговара на целата нумера, за да може крајниот слушател/гледач како аудио така и визуелно да ја почувствува енергијата. Идеата за видео записот е моја, а го работевме заедно со Дарко Димитриевски кој всушност беше задолжен и за самото снимање и едитирање на видеото и генерално мислам дека ја доловивме приказната во едно симпатично видео. Спотот се снимаше на неколку локации во центарот на Скопје и идеата беше да се опфаат повеќе локации во најразличен период од денот за да може директно да го поврземе со одредени клучни моменти во текстот, додава тој.
Периодот од летотo наваму Дарко е доста активен во издавање на нова македонска музика.
-Во септември имавме песна на “ОхридФест 2023” со наслов “Само ти”, потоа беше издадена “Мојот свет” на која се јавувам како автор и изведувач. Исто така на “МакФест 2023” не претставуваше Јасмин Алиевски со песната “Се смеам и кога врне” за на крај да го заокружиме овој период со оваа најнова песна “Со кого заспиваш” на која исто така се јавувам како артист. Во периодот кој следи сакам да најавам многу нови проекти и доста работа за нас како автори и продуценти, за што веќе имаме договорено неколку соработки со артисти од државата и надвор, откри тој.
Но, интерсно е и што Дарко работи на еден многу интересен и модерен дует со девојче кое последниов период е доста актуелно како артист,но не откри за која пејачка станува збор.
