Полицијата користи разновидна технологија за следење луѓе – од препознавање лица до базни станици и следење на мобилни податоци. Но, некои луѓе наоѓаат начини да ја користат технологијата за тие да ја следат полицијата. Сигналите на „Блутут“, на пр. може да препознаат каде се наоѓа полицијата, и кога таа користи камери, следачи, па дури и дали има пиштоли за електрошок, пишува „Енгаџет“ (Engadget).
Сите уреди со „Блутут“ имаат единствен 64-битен идентификатор наречен „МАЦ-адреса“. Честопати, таа адреса се состои и од тн. „Организациски единствен идентификатор“ (ОУИ), што во суштина е она коешто „кажува“ кој го направил уредот. Тоа својство на „ИоТ-уредите“ што ги користат многу полициски сили го поврза Алан Микинс, основач на фирмата – „РФПарти“ и истоимената „Блутут“ програма и неговиот соработник Роџер Хикс, со „Акон“ – компанија за електрошокери.
– Има сигнал што се испраќа кога полицаецот вклучува уред за снимање, и којшто луѓето можат да го откријат, рече Микинс.
Современата полициска опрема е полна „Блутут“ технологија, често произведена од „Аксон“, а тоа се нивните електрошокери, камери и компјутери за во возило. Со трагање по дигиталните записи на компанијата, хакерите можат да го следат ОУИ.
Вклучувањето на „РФПарти“ собира податоци. Ако уредот почне да снима, испраќа „Блутут“ сигнал до други уреди. Ако полицаецот вклучи камера (пиштол за шок или друг „ИоТ-уред“), некој што ја користи таа апликацијата може да ги собере и тие податоци, т.е. подробности за инцидентот.
Ист е случајот и со радиобрановите. Ако некој има опрема за следење на каналите што ги користат службите за итни случаи и го знае јазикот и шифрите што се пренесуваат, тогаш може да го слушне полициското радио.
Претставник на „Аксон“ потврди дека компанијата користи „Блутут“ за спојување на автомобилските системи со мобилни апликации, како и камери. Користењето „Блутут-врска“ помага „да се обезбеди инцидентите да се документираат и уредите да бидат поврзани заради поголема видливост“, според компанијата.
– „Аксон“ работи на дополнителни мерки и подобрувања за да ги реши проблемите поврзани со следењето на нашите уреди. Поточно, ротирање на единствени адреси на „БЛЕ“ (познати како „МАЦ-адреси“) што можат да ги идентификуваат нашите уреди, како и отстранување на потребата да се вклучат сериски броеви во „Блутут“ емитувањата, додаде гласноговорникот.
Ниту една од функциите на апликацијата „РФПарти“ не е наменета за полициско следење – се работи за општа услуга за „Блутут-скенирање“. Но, тука спаѓаат и уредите што ги користи полицијата.
Поседувањето такви податоци, од друга страна, може да значи и злоупотреба, но според познавачи, засега е тешко веројатно дека апликацијата ќе стане популарна во размер каде што податоците ќе бидат достапни за секој таков случај. Сепак, кога полицијата има моќ да користи технологија речиси против секого, има можности и опасност таа состојба да се сврти во обратна насока.
