Вечерва, со почеток во 20 часот, во салата на Македонската филхармонија ќе се одржи концертот “Памтим само сретне дане”. На концертот ќе се пеат хитовите на загрепската поп рок школа од 80-тите и 90-тите години во придружба на филхармонијата.
Публиката ќе има можност да ужива во бесмртните хитови на Парни Ваљак, Прљаво Казалиште, Nови Фосили, Сребрена Крила, Aerodrom, Габи Новак, Јосипа Лисац, Тајчи… како и на авторите Зринко Тутиќ, Хусаин Хасанефендиќ-Хус, Рајко. Дујмиќ, Ѓорѓе Новковиќ, Џони Штулиќ, Арсен Дедиќ и други, во малку поинаков аранжман, направени од Јосип Цвитановиќ, Оља Дешиќ и Иван Попескиќ.
Солистите придружувани од Македонската филхармонија, под диригентската палка на Јосип Цвитановиќ, ќе се потрудат во една вечер да направат мал избор на хитови од загрепската поп-рок школа, како „Памтим само сретне дане“, „Кошуља плава“, „Данас сам луда“ , „За добра стара времена“, „Љубав“,„Још и данас замирише трешња“ ,„ Мој бели лабуде“, „Голубови“ и многу други.
Како вокални солисти ќе настапат легендарните Владо Калембер и Јурица Паѓен, Аида Мушановиќ-Аршиќ, Дејан Цукиќ, Агни Афсар, Мартина Мајерле и Макс Хозиќ.
-По минатогодишната премиера на проектот „Има једна тајна веза“, брзо и природно следеше идејата на ист начин да се претстават хитовите на загрепската поп рок школа. Песните на Арсен Дедиќ, Кемал Монтен, Рајко Дујмиќ, Хусеин Хасанефендиќ Хус, Зринко Тутиќ… навистина го заслужуваат тоа, само штета што нема да можеме да покриеме се на еден концерт, туку само мал дел. Се обидовме да го направиме репрезентативен пресек и веруваме дека публиката нема да биде разочарана“, изјави Томислав Кашљевиќ, и самиот голем љубител на кросовер форматот и додаде:
„Новата форма внесува нов живот во хитовите кои ни се оставени додека стигнува до нова публика и продолжува да се пренесува на понатамошните генерации, а Македонската филхармонија исто така ја отвора вратата за нова публика со кросовер проекти, така што ова е вин-вин проект. Со оглед на тоа што сега немаме многу среќни денови, многу често сакаме и сакаме да се вратиме во деновите што беа посреќни. Убава е идејата на организаторите да одржат концерт со хитови од тоа време“, рече Габи Новак, чиј проект го носи името на големиот хит “Памтим само сретне дане”.
-За жал Габи Новак поради долгото опоравување од скршеници на раката и колкот, нема да може да настапи на овој концерт. Жалиме за тоа и и посакуваме брзо опоравување, велат од организацијата.
