ВРТ, телевизиска станица на холандски јазик во Белгија, изрази загриженост во врска со натпреварот за песна на Евровизија. ВРТ ја повикува Европската радиодифузна унија да обезбеди целосна транспарентност во врска со гласањето на публиката во овогодинешното финале на Евровизија.
„Немаме индикации дека броењето на гласовите не е извршено правилно, но бараме целосна транспарентност од ЕБУ. Прашањето е дали сегашниот систем на гласање е чесен одраз на мислењата на гледачите и слушателите“, изјави портпаролката на ВРТ, Јасмин Ван дер Боргт.
ВРТ апелира за дискусија во сите земји бидејќи се загрижени за опстанокот на натпреварувањето.
„Ние во ВРТ забележавме дека Евровизискиот натпревар, како што е моментално организиран, станува сè помалку обединувачки и аполитичен настан. Тој е сè повеќе спротивен на оригиналните норми и вредности на настанот и јавното емитување. ВРТ добро соработува со ЕБУ на многу нивоа, но без сериозен одговор на нашите загрижености во врска со Евровизискиот натпревар, го доведуваме во прашање нашето идно учество“, додаде портпаролката.
Треба да се напомене дека ВРТ не може да одлучи дали Белгија ќе учествува на Евровизискиот натпревар следната година, бидејќи тогаш учеството треба да го организира РТБФ, јавниот сервис на француски јазик во Белгија. Сепак, ВРТ треба да се врати како организатор на белгиското учество во 2027 година.
Европската радиодифузна унија одговори на повиците на ВРТ.
„Остануваме во постојан контакт со сите емитувачи и сериозно ги сфаќаме нивните загрижености. Сега кога настанот заврши, ќе имаме поширока дискусија со земјите учеснички за да размислиме и да добиеме повратни информации за сите аспекти на овогодинешниот настан“, рече директорот на Евровизија, Мартин Грин, пренесува индекс.хр.
„Важно е да се нагласи дека процесот на гласање на Евровизија е најнапреден во светот и дека резултатите од секоја земја се проверуваат и верификуваат од огромен тим луѓе за да се исклучат какви било сомнителни или нерегуларни модели на гласање. Независен уред ги проверува податоците од жирито и гласањето на јавноста за да се обезбеди валиден резултат. Нашиот партнер за гласање „Once“ потврди дека е регистриран валиден глас во сите земји што учествуваа во овогодинешното големо финале“, додава Грин.
ВРТ е еден од двата радиодифузери кои јавно изразија загриженост во врска со гласањето за Евровизија 2025. Шпанската РТВЕ повика на итна дебата за сегашниот метод на гласање, објаснувајќи дека има прашања за тоа дали сегашниот метод е соодветен во контекст на вооружени конфликти како оној во Газа и каде што се смета дека тие конфликти директно влијаат на резултатите.
