Поранешниот директор на Зоолошката градина во Скопје, Ѓорѓи Галетановски, кој конкурираше на огласот за нов директор на оваа установа, вели дека и по завршување на конкурсот нема никаков одговор дали е примен или не.
Дотолку повеќе, вели тој во соопштението на Фејсбук, заминал да си ги земе документите, но од таму не му ги дале, а пликот воопшто не бил ни отворен.
-Два месеца по завршувањето на огласот за директор на ЗОО Скопје, огласот сè уште е отворен, а одамна се поминати сите законски рокови за жалби. Во присуство на адвокат, денеска бев во ЗОО Скопје да ги подигнам моите документи и одбија да ми ги вратат со банални објаснувања, дека документите не се разгледани (пликото не е отворено) ниту пак се пратени до градоначалничката на Град Скопје, поради што ќе следува тужба од моја страна. Без разлика на сите отежнителни околности со кои се соочувам во моментов, јас не се откажувам од она за што се залагам. Сакам да ги известам посетителите и моите колеги од Зоолошката градина дека мојот следен чекор е формирање фондација под името „За европска зоолошка“, чија примарна цел ќе биде обезбедување финансиска поддршка за Зоолошката градина во Скопје и нејзините вработени, напиша тој и додаде:
-Фондацијата ќе биде посветена на развојот и одржувањето на Зоолошката градина според европски стандарди, овозможувајќи соодветни услови за живот на животните, унапредување на инфраструктурата, како и обезбедување средства за професионален развој и соодветни услови за работа на вработените – какви што впрочем заслужуваат, а во моментов ги немаат. Со формирањето на фондацијата ќе се стремам за зголемување на свесноста за важноста на заштитата на животинскиот свет и едукацијата на јавноста за овие прашања, во соработка со релевантни европски институции и организации. Воедно, ќе бидат активирани многу домашни и странски фирми и донатори кои ќе помагаат со финансии за потребите на ЗОО Скопје. Од редот на вработените во ЗОО Скопје ќе назначам и ополномоштам вработен кој ќе има увид во финансиите, со право да управува со истите. Сакам да им се заблагодарам за поддршката и да ги охрабрам моите колеги од институцијата кои работат посветено и професионално, а кои се соочуваат со притисоци – да се борат за нивните права и заслуги исто како што се боревме заедно! Никој не смее изживува со нив и да врши мобинг. Ги повикувам, доколку имаат потреба од правен совет, мојот адвокат секогаш ќе биде на располагање за било какво прекршување на Законот за работни односи, со цел да бидат заштитени. Департизацијата на Зоолошката градина Скопје останува моја прва и единствена цел и останувам да се борам за тоа, напиша тој.
