Со есенската потрошувачка кошница се опфатени производи коишто се најкористени од страна на граѓаните, изјави денеска премиерот Христијан Мицкоски во одговор на обвинувањата од опозицијата дека се ограничува маржата на 70-тина производи за разлика од времето на СДСМ кога биле донесени мерки за намалување на повеќе од 500 производи.
– Оваа есенска кошница е таргетирана и е резултат на анкета што е правена со граѓаните за тоа кои се производите што оваа есен се најкористени. Иста таква кошница ќе има и пред новогодишните празници, ќе има и пролетна кошница така што нашата цел како Влада е производите кои се најупотребувани од страна на граѓаните да бидат опфатени со оваа мерка, истакна Мицкоски во изјава за медиумите дадена по посетата на општина Кавадарци.
За обвинувањата од опозицијата рече дека се безидејна порака и дека во нивно време данокот на додадена вредност бил зголемен од пет на десет проценти, а бил воведен и данок на луксуз.
Опозицијата денеска преку соопштение оцени дека мерките на Владата се задоцнети и дека нема да имаат никаков реален ефект врз намалувањето на цените на производите и врз стандардот на граѓаните.
– Наместо економска политика гледаме калкулантска политика на Владата на Мицкоски и тотална негрижа за стандардот на граѓаните. СДСМ на пример минатиот септември 2023 година донесе мерки за намалување на над 500 производи во 25 различни категории и реализираше антикризен пакет за помош на граѓаните вреден 662 милиони евра. Тоа е реална помош. Во соседна Србија веќе се спроведува одлука со која поевтинија над 700 производи, слично е во Црна Гора. Во исто време се случува за прв пат после пет години постојан раст да се намали просечната плата за речиси 1000 денари, наведува опозициската СДСМ во соопштението.
Владата вчера ја објави есенската потрошувачка кошница и ја ограничи профитната маржа на 73 прехранбени производи кои треба да бидат со намалени цени до 31 октомври годинава.
Производите вклучени во есенската кошница на полиците, фрижидерите и разладните уреди, треба јасно да бидат обележани со натписот „помалку трошоци, повеќе за тебе“.
Одлуката е донесена врз основа на податоците од Државниот завод за статистика, за индекс на трошоци за живот, кои покажуваат дека споредено август 2024 година, со декември 2023 година, евидентирано е зголемување на трошоците за храна за 4 проценти.
