Според прелиминарните резултати од вториот круг од вонредните парламентарни избори во Франција, што рано утринава ги објави француското Министерство за внатрешни работи, левичарската коалиција Нов народен фронт (НФП) освои 182 места во националното собрание, објави Монд.
Политичкиот сојуз на актуелниот француски претседател, центристичкиот блок Заедно, освои, според тие податоци, 168 пратенички места, а на трето место е крајнодесничарската партија Национален собир (РН) на Марин Ле Пен со 143 освоени пратенички места.
Либерално-конзервативната партија Републиканците освоија 45 пратенички места, десничарската коалиција 15, левиот блок 13, а регионалистите четири пратенички места.
Францускиот лидер Емануел Макрон нема да се обрати до нацијата по објавувањето на првите резултати од вториот круг парламентарни избори, пренесува „Фигаро“ повикувајќи се на Елисејската палата.
Забележано е дека говорот на претседателот не е планиран. Во моментов Макрон ги проучува резултатите од парламентарните избори како што се објавени по области, се вели во написот на весникот.
Макрон претходно изјави дека прелиминарните резултати од парламентарните избори во Франција не покажуваат „кој ќе владее“.
Лидерот на левичарската коалиција Нов народен фронт, Жан-Лук Меланшон, која води на парламентарните избори во Франција, доцна синоќа изјави дека коалицијата ќе инсистира на признавање на независна Палестина. Во говорот пред поддржувачите, Меланшон посочи дека постои можност потешко да се спроведе надворешнополитичката програма на неговата коалиција, за која ќе разговараат новиот премиер и претседателот Емануел Макрон.
-Тие ќе мора да се помират со фактот дека ја признаваат Палестина што е можно поскоро, рече тој додека толпата извикуваше „Слобода на Палестина“, пренесува Политико.
Судири со органите на редот и вандалски акти биле пријавени во Париз, Лион, Нант и Рен во текот на ноќта по вториот круг од парламентарните избори, објави Журнал ду диманш. Во француската престолнина биле подметнати пожари, а полицајци биле мета на пиротехнички средства на Плоштадот на Републиката, објави „Фигаро“. Полицијата се судри со група маскирани лица со качулки „кои очајнички се обидуваа да ги испровоцираат органите на редот“, додава весникот.
Претходно во таа област имаше митинг на приврзаниците на левичарскиот „Новиот народен фронт“, кој победи на парламентарните избори во Франција. Во Нант, демонстрантите фрлаа шишиња и бомби кон полицијата, која одговори со солзавец. Повреден е еден полицаец. Префектурата Рен објави 31 апсење за акти на вандализам.
МИА
