Шведската група АББА, основана во 1972 година од Бени Андерсон, Бјорн Улвеус, Ани-Фрид Лингстад и Агнета Фелцког, победи на Евровизија во април 1974 година со песната Ватерло. По повод 50-годишнината од победата на најпознатото музичко натпреварување, групата се огласи на Инстаграм. Тие објавија фотографија од Евровизија и им се заблагодарија на своите фанови, пишува Индекс.хр.
„Малку е вртоглаво да се мисли дека милиони од вас, кои не гледавте за прв пат во финалето на Евровизија во 1974 година, ја пренеле нашата музика не на една генерација, туку на неколку од нив. Доказ за тоа гледаме секој пат кога некој од нас ќе ја посети Abba Voyage во Лондон и затоа можеме да ја прославиме 50-годишнината од тој настан знаејќи дека нашите песни сè уште одекнуваат низ светот“, напишаа во заедничката објава.
„Тешко е да се сфати дека поминаа 50 години откако ние четворицата чекавме зад сцената на одлуките на сите жири комисии низ Европа во Брајтон. А кои беа нашите соништа во тие напнати моменти и хаос по победата? Четири различни соништа, без сомнение, но какви и да беа, колку и да беа величествени, реалноста ги надмина, тоа е сигурно“, додаваат тие.
„Многумина од вас беа со нас од почетокот и нè следат од тогаш, повеќе од половина век. Музиката што ја откривате и ја сакате додека растете останува со вас засекогаш. Тоа искуство го споделуваме со вас и да знаете дека нашата музика стана константа во вашите животи е прекрасна работа“, велат тие.
Тие им се заблагодарија на сите фанови ширум светот.
„Со текот на годините бевме благословени со вашата љубов. Сакаме да ви се заблагодариме за она што ни го давате. Ова е и среќен и свечен момент и можеме само да се надеваме дека разбирате колку сме длабоко благодарни за долгата, успешна кариера и за вашата непоколеблива лојалност и поддршка низ годините. Благодарам“, заклучија тие.
