Израелскиот министер за надворешни работи, Гидеон Сар испрати писмо до Советот за безбедност на Обединетите нации во кое тврди дека Иран има „стратешки план“ за елиминација на Израел, велејќи дека неговата земја е решена да се одбрани.
„Иран има стратешки план за уништување на Израел. Израел не може и нема да ја прифати заканата од уништување“, напиша Сар на платформата Икс, објавувајќи копија од писмото, објави Cи-Ен-Ен.
Нападот на Израел врз Иран, напиша Сар во писмото, беше започнат по клучниот развој во нуклеарната програма на Иран и имаше за цел да ја спречи непосредната закана од дополнителни ирански ракетни и посреднички напади.
Одлуката за напад беше донесена „како последно средство“, се вели во писмото на израелскиот министер за надворешни работи.
Израел и Иран разменуваат ракетни напади и напади со дронови речиси една недела, откако Израел изврши ненадеен напад во кој загинаа неколку високи ирански функционери во обид, како што тврди, да се спречи Техеран да ја развива својата нуклеарна програма.
Иранските ракети паднаа во Тел Авив како одговор на израелскиот напад во кој загинаа десетици луѓе.
