Едносменското работење на училиштата придонесува за намалување на тековните трошоци, а заштедените средства можат да се пренаменат за други корисни цели, изјави денеска претставничката од Министерството за образование и наука, Јаневска, при работна посета во Штип.
Таа истакна дека и училишните раководства треба да дадат свој придонес во овој процес, избегнувајќи злоупотреба на јавните ресурси. Како негативен пример го наведе случајот со директор на училиште во Струмица, кој дозволувал партиски состаноци во училници доцна навечер, уверувајќи се дека тоа ќе остане незабележано.
Јаневска информираше дека во моментов 150 училишта низ државата веќе спроведуваат настава во една смена, а крајната цел е сите училишта да преминат на ваков модел. Иако училиштата се под ингеренција на општините, Министерството за образование и науката, како и Владата, ќе продолжат да даваат поддршка за овие процеси.
– Во земјата има уште 245 училишта со двосменска настава. Веќе правиме анализа за условите и потребите, за да пресметаме какви и колкави инвестиции се неопходни. Некаде ќе треба доградба, некаде преадаптација, а на одредени места и изградба на целосно нови објекти. Според првични проценки, ни се потребни околу 300 нови училници, рече Јаневска.
Таа додаде дека овој процес бара време и финансии, но изрази уверување дека целта може да се постигне во текот на наредните неколку календарски години.
Градоначалникот на Општина Штип, Иван Јорданов, се заблагодари за континуираната поддршка од Министерството, истакнувајќи дека еден од позначајните тековни проекти е реконструкцијата на кровот на Гимназијата „Славчо Стојменски“.
– Посебно би ја издвоил и реконструкцијата на спортската сала на ООУ „Димитар Влахов“, што со години е потреба на учениците и наставниците. Ова училиште станува едно од најголемите во градот, нагласи Јорданов.
Тој додаде дека завршен е и тендерот за целосна реконструкција на спортската сала во ООУ „Тошо Арсов“, каде ќе се обнови подот, соблекувалните и спортскиот инвентар.
