Новиот поглавар на Католичката црква, папата Лав XIV, вечерва се појави на главниот балкон на базиликата „Свети Петар“ и пред десетици илјади собрани верници го одржа својот прв говор по изборот.
„Мир со сите вас“, беа првите зборови на 69-годишниот папа, роден во Чикаго, кој зборуваше на италијански јазик. „Браќа и сестри, ова е првиот поздрав на воскреснатиот Христос. Сакам да упатам поздрав на мирот што стигнува до вашите семејства, до сите вас, каде и да сте. Нека мирот биде со вас“, рече тој, предизвикувајќи бурен аплауз и радосни извици од толпата.
Папата Лав XIV ја продолжи својата порака со повик за љубов и заедништво, нагласувајќи: „Бог нè сака сите, безусловно“. Тој му оддаде почит на својот претходник, папата Франциск, и изрази желба да го следи неговиот пример, давајќи благослов на верниците на плоштадот „Свети Петар“.
– На човештвото му е потребен Христос како мост до Бога и неговата љубов. Помогнете ни, и да си помагаме едни на други, да градиме мостови, порача новиот папа.
Тој им се заблагодари на кардиналите што го избрале на дводневната конклава и упати посебен поздрав до Црквата во Рим.
На шпански јазик, Лав XIV се обрати и на својата поранешна бискупија во Перу, каде што, како што рече, „верниот народ ја споделуваше својата вера и даде многу“.
На крајот од говорот, папата ги повика верниците заедно да ѝ се помолат на Дева Марија, по што плоштадот повторно се исполни со воодушевување. Тој прочита извадок од светите текстови на латински јазик во чест на светците и Богородица, а потоа уште еднаш ги благослови собраните. Додека оркестарот на карабинерите свиреше во позадина, папата Лав XIV мавна на мноштвото што го исполни плоштадот, каде што продолжи прославата.
Американецот Роберт Франсис Превост е избран за нов папа и го одбра името Лав XIV, соопшти кардиналот Доминик Мамберти пред собраните верници на плоштадот „Свети Петар“.
Тој само што излезе на балканот, облечен во белост, на радост на мноштвото верници.
Превост (69), е роден во Чикаго, Илиноис, САД. Тој беше префект на Дикастеријата за епископи и претседател на Папската комисија за Латинска Америка од 2023 година. Претходно беше епископ на Чиклајо во Перу од 2015 до 2023 година и го предводеше Редот на Свети Августин од 2001 до 2013 година. Во 2015 година, кардиналот Превост стана натурализиран граѓанин на Перу.
Белиот чад од Сикстинската капела попладнево го означи изборот на новиот лидер на 1,4 милијарди католици ширум светот.
Според кардиналот Џузепе Версалди, изборот на новиот папа во само четвртиот круг на гласање е „јасен знак на единството во Црквата“.
– Новиот папа беше избран дури и побрзо од неговиот претходник, изјави Версалди (81), потсетувајќи дека папата Франциск беше избран во 2013 година по два дена и пет круга гласање.
На плоштадот „Свети Петар“ одекнува радосното скандирање „Viva il papa“ („ Да живее папата“), додека оркестарот свири под балконот на базиликата. Мноштвото верници спонтано аплаудира, искажувајќи воодушевување за новиот поглавар.
Папата Лав XIV се очекува наскоро да се појави на балконот, познат како Лоџа на благословите, за да го даде својот прв благослов „Urbi et Orbi“ – „За градот и светот“. МИА
