Премиерот Христијан Мицкоски денеска оствари средба со лидерот на опозициската СДСМ Венко Филипче на која беше истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани, соопштуваат од Владата.
Како што се наведува во соопштението, Мицкоски ја посочил потребата од мобилизација на сите напредни поединци и структури кои можат да дадат придонес на патот за развој на земјата и побарал од Филипче да биде конструктивен фактор во определбата за промени.
– Беше истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани. Во тој контекст неопходно е да се мобилизираат сите напредни поединци и структури кој можат да дадат придонес на патот за развој на земјата. Македонските државни интереси треба да бидат појдовната точка во разговорите за секое прашање, стои во соопштението.
Додаваат дека на средбата било договорено да се формираат работни групи кои ќе разговараат за реформските решенија кои треба да ги гарантираат заложбите за напредок.
