Државниот обвинител Љупчо Коцевски да отвори истрага за да се најдат вистинските виновници за трагедијата со пожарот во Модуларната болница во Тетово, побараа семејствата на загинатите во тетовската болница. Мумин Исмаили, еден од членовите на семејството на настраданите на прес-конференција изјави дека семејствата го поддржуваат отвореното писмо на Иницијативата Нулта, која бара правда за трагичниот настан од 8 септември 2021 година.
„Време е правдата да излезе од плакарот. Треба да се отвори истрага за вистинските виновници, да се формира независен тим кој ќе ги прошири сите аспекти на случаите, вклучително и одолговлекувањето на судските постапки. Германското вештачење треба да биде клучен доказ во истрагата. Ќе продолжиме да зборуваме за нашите најблиски“, рече Исмаили.
Минатата недела Иницијативата Нулта одржа протести во Тетово барајќи правда за трагични случаи со Модуларната болница, „Дурмо турс“ и „Беса Транс“.
При тоа побара повторно отворање на истрагите за случаите на модуларните болници во Тетово, повторно судење за случајот „Дурмо турс“ во Ласкарца и повисоки казни за случајот „Беса транс“ во Бугарија.
„Обвинителството за борба против криминал и корупција да ја извади од фиока истрагата за причините за пожарот во модуларната болница. Против главните виновници за овој случај треба да бидат поднесени пријави. Бараме и независна и непристрасна истрага за случајот со дискотеката во Кочани. Бараме вклучување на надворешни експерти за да обезбедиме транспарентност и правичност. Одговорност за прекршителите на законот треба да има“, бараат од Иницијативата Нулта.
Од Апелациониот суд Иницијативата бара да го врати на повторно судење случајот Дурмо Турс во Ласкарце и да ги земе в предвид жалбите на Јавното обвинителство. Побара да биде донесена и забраната за дејност за сопствениците на „Дурмо-турс, како и повисоки казни за обвинетите во случајот „Беса транс“.
