Во Штип ќе се отвори првиот Центар за рехабилитација за лицата со посебни потреби, најавија попладнево заменик министерот за социјална политика, демографија и млади, Ѓоко Велковски, градоначалникот на Општина Штип, Иван Јорданов и родителите на лицата со посебни потреби.
Градоначалникот на Општина Штип, Јорданов изјави дека Центарот за рехабилитација ќе биде сместен во дел од зградата во средното текстилно училиште. Тој посочи дека во овој центар ќе се работи со децата и повозрасните лица со посебни потреби со цел да бидат работно способни и да се пронајдат на пазарот на труд.
-Одвоени се повеќе од 10 милиони денари. Верувам дека доколку има заедничка соработка ќе се изнаоѓаат решенија. Јас верувам во намерите на Владата и Локалната самоуправа да се најде решение на нивното секојдневие, рече Јорданов.
Заменик министерот за социјална политика, демографија и млади, Велковски истакна дека во наредниот период ќе се подготви тендерската постапка за отварањето на Центарот за рехабилитација, во којшто ќе се опфатат 24 лица, а со кои неколку часа ќе се работи со нив, за подобрување на состојбата во која се наоѓаат.
-Ќе се опреми самиот Центар, а треба да се фокусираме и на Програмата за работа и како работно да ги ангажираме лицата со поречености. Затоа треба да разговараме и со бизнис центарот за овие дечиња да можат да бидат професионално ангажирани и да можат да бидат корисни за својата средина, вели Велковски.
Зоран Мијалков родител на деца со посебни потреби вели дека ова е прв чекор и надеж дека ќе се слушне и нивниот глас.
-Како родител ова е од големо значење за нас. Ова е почеток, ова е првпат нашиот глас да е важен. Претходно нас никој не не прашуваше. Во овој случај се надевам дека ќе се постигне тоа дека децата ќе добијат работна терапија, изјави Мијалков.
Во Штип на денешната средба беа преставници, родители на деца со попречености, и заеднички сите чинители ќе носат одлуки за функционирање на овој Центар.
