Денеска стартуваше изградбата на мега паркот „Иднина“ на 70 илјади квадратни метри до булеварот „Партизанска“. Со изградбата на паркот, финиширањето на булеварот и изградбата на трговски објект, овој дел од градот ќе добие сосема нов урбан лик.
Планирано е во рамки на паркот да има и мало езеро.
- Зелена површина, зелена оаза којашто ќе го промени начинот на живот во нашиот град, но и изгледот на Општина Штип. После изградбата на овој мега парк граѓаните ќе добијат видоеизменет град и една содржина која сум сигурен дека не само штипјани туку ќе ја користат и граѓаните кои ќе доаѓаат од околните населени места. Вредноста е околу 100 милиони денари, на површина од околу 70.000 метри квадратни, а ќе се простира по должината на велосипедско пешачката патека. Верувам дека по изградбата на овој парк проектот ќе добива вредност како ќе минува времето затоа што целата вегетација која е предвидена и зеленилото кое е предвидено со тек на време ќе додаде вредност и на паркот и на се она кое наоколу ќе се создава, а ќе се гради многу. Имајќи во предвидед дека е во близина на булеварот „Партизанска“ и на новата зона за домување , перспективно во наредните години ова ќе биде еден од најубавите делови од нашиот град, вели штипскиот градоначалник Иван Јорданов.
Паркот се планира да биде готов за околу 4 месеци, а бунарскиот систем од кој некогаш се снабдуваше Штип со вода се планира да остане во рамките на паркот, но како заштитена зона, а бунарите да останат во функција како алтернатива на катуелниот водоснабдителен систем на градот.
