Заеднички проект на општина Штип со општината Гоце Делчев во Бугарија, финансиран од европски фондови. Целта на проектот е изградба на зелена инфраструктура, што вклучува изградба на нови паркови и зелени површини во двете општини. Проектот е дел од стратегијата за подобрување на животната средина и создавање на поубави и поеколошки здрави простори за живеење.
Градоначалниците на Штип и Гоце Делчев, Иван Јорданов и Владимир Москов, заедно со претставници од Министерството за локална самоуправа и Центарот за развој на Источно планскиот регион, истакнаа дека овој проект ќе има долгорочни позитивни ефекти врз животната средина. Покрај градењето на паркови, предвидена е и едукација на жителите за важноста на заштитата на природата, како и изработка на Стратегија за понатамошен развој на зелена инфраструктура.
Проектот е дел од поширока иницијатива за позеленување на пограничниот регион, со што двете општини очекуваат дека ќе допринесе за зачувување на животната средина, но се планира да има позитивен ефект и на локалната економија и квалитетот на животот на граѓаните.
Штипскиот градоначалник Јорданов додаде дека предвидено е нов парк во населбата Осми Ноември, но и парк кај бањата Кежовица, како и во близина на зградата на Противпожарната единица. Дополнително општината ќе учествува со сопствени средства во низа проекти, со што Штип годинава ќе добие зелена трансформација.
- Повеќе од 280. 000 евра се предвидени за паркови површини преку овој проект, на три локации, повеќе од еден хектар ќе имаме зелена површина, уредена. Дополнителни ние како локална самоуправа од сопствени средства предвидуваме финансирање на низа проекти во рамки на таа зелена агенда. Деновиве ќе започне изградбата на мега паркот покрај булеварот „Партизанска“, изјави Јорданов.
Градоначалникот на Општина Гоце Делчев, Владимир Москов рече дека кај нив ќе се работи на реконструкција на плоштадот „Македонија“ и уредување на градскиот парк.
- Кај нас ќе биде обновен и реконструиран плоштадот „Македонија“, тоа е местото пред нашиот културен дом, заедно со целиот парк кој треба да биде обновен. Ќе се работи и на воведување на нови содржини за прошетка, за забава и одмор на граѓаните, изјави Москов.
Државниот советник во Министерството за локална самоуправа, Вангелски изјави дека во оваа приоритетна оска беа одобрени пет проекти и тоа во пет општини во земјава, со вкупен износ од 4,1 милион евра. Сите пет проекти во изминатиот период започнаа со имплементација и се очекува да бидат завршени во наредните две години.
- Министерството за локална самоуправа учествува со 15% кофинансирање на целиот проект и очекуваме да се исполни очекувањето од овој проект за позелен пограничен регион и и отворање на нови работни места, рече Вангелски.
Проектот за позеленување на пограничниот регион меѓу Бугарија и Северна Македонија има вкупна вредност од 860.000 евра и треба да се заврши за 24 месеци. Откако беше одржана првата прес-конференција за овој проект, започна изградбата на паркот во населбата Осми Ноември во Штип, кој ќе има пешачки патеки, урбана опрема, реквизити за деца и осветлување.
