Штипскиот универзитет „Гоце Делчев“ ќе му отстапи на Државниот испитен центар амфитеатри за полагање на државната матура на штипските средни училишта во мај и јуни годинава.
Согласно правилата за полагање на државна матура, просторно матурантите треба да бидат оддалечени еден од друг со по 1,5 метри растојание, што за дел од училиштата просторно можност има само во спортските сали. Од таа причина Државниот испитен центар заедно со директорите на штипските средни училишта се обратија кај универзитетот за помош во реализацијата на испитите:
- Големиот простор нуди поголеми можности во поглед на тоа што ние имаме поголема прегледност, самите тестатори можат полесно да ги набљудуваат учениците, да се намали делот на препишување, затоа што знаете дека изминатите години се соочувавме со еден таков проблем, за да имаме што е можно поголема објективност во реализација на државната матура и се разбира поголеми достигнувања кај самите ученици, вели директорката на Државниот испитен центар, Даниела Јовчевска Михајловска.
Токму просторните ограничувања претходните години водеа до измами и обиди за препишување:
- Се работи да се надминат сите проблеми кои што се појавуваат, ги гледаме сите претходни искуства коишто ги има државниот испитен центар во поглед на матурата, така што искрено очекуваме да бидат надминати, вели Јовчевска Михајловска.
Од универзитетот се целосно отворени за излегување во пресрет на училиштата, но и на своите идни студенти:
- Ние како универзитет сме должени и ќе направиме се што е на наше располагање, да го ставиме на располагање на Државниот испитен центар и на училиштата од Штип и верувам дека учениците ќе имаат соодветни услови за полагање на матурата, ќе имаат комфор, простор, каде што ќе можат непречено да ги реализираат сите активности, како универзитет веќе имаме одредени активности со кои им помагаме на идните наши студенти, се надевам да бидат што подобри во реализација на матурските испити, да постигнат што подобри резултати и се надевам дека на тој начин подобро ќе го запознаат и универзитетот, како простор во кој што би можеле да го реализираат своето академско образование, но и како простор кој што, не само за матурските, туку во кој може во иднина да дојдат, да работат, да соработуваат со нашите колеги професори, со нашите студенти и верувам дека универзитетот ќе биде соодветен партнер во реализација на сите овие активности, вели ректорот на УГД, Проф. д-р Дејан Мираковски.
Универзитетот располага со просторни капацитети во речиси сите свои кампуси:
- Согласно барањата, односно критериумите, кои што ги има Државниот испитен центар, не во детали, меѓутоа универзитетот има голем број на амфитеатри, во кои што имаме од 80, па до 240 места, и во кои што има соодветни услови за сместување на студентите, современи амфитеатри, такви имаме четири на Кампус 2, два во објектот на ФОН, еден во објектот на Правен, во објектите на поранешното текстилно училиште, во објектите на Економскиот факултет, едноставно имаме доволно простор за да се сместат сите ученици кои што се од училиштата од Штип. Објектите ќе бидат оставени на целосно располагање на учениците и на испитните комисии, ние ќе го обезбедиме просторот и техничката поддршка за реализација на активностите, подлвекува Мираковски.
М. Каровски
