Објавен е конкурсот за избор на спортист на годината за 2024та во Штип, информираше на денешната средба со новинарите, претседателот на комисијата за Спорт при Советот на Општина Штип, Никола Костадинов.
Како што информираше, пријавувањето ќе трае до 10 јануари, а право да се пријават имаат сите спортисти, клубови и спортски работници кои во текот на изминатата година оствариле значајни резултати.
- Денеска Општина Штип распиша јавен повик за избор на спортист за 2024 година. Апликациите можат да се видат и симнат од сајтот на Општина Штип, како и во архивата на Општина Штип. Повикот трае до 10 јануари 2025 година. Право на учество имаат сите спортиски кои резултатите ги постигнале во штипски клубови. Учествуваат сите категории, пионери, кадети, младинци и сениори, изјави Костадинов.
Во пријавата за учество во избор на спортист за 2024 година на град Штип се наведени и критериумите кои треба спортистот да ги исполнува.
- Еден од најважните критериуми е да биде учество во клуб од Штип, но ќе бидат земени резултатите на Олимписки, Светски, Европски и Балкански првенства, додаде Костадинов.
По завршувањето на рокот, комисијата ќе ги разгледа пријавите и ќе одлучи кој ќе ја освои титулата најдобар спортист, врз основа на утврдените критериуми.
Комисијата по 20 јануари 2025 година исто така ќе го утврди и точниот датум кога ќе се прогласи најдобриот спортист за 2024 година во Штип.
