Серија земјотреси деновиве го тресат регионот. Во текот на вчерашниот ден првиот е регистриран во Србија, поточно во Бујановац, со магнитуда од 1,7 степени по Рихтеровата скала, во 2 часот и 25 минути во текот на ноќта. Потоа следуваше во Јадранското Море, кај Херцег Нови, со јачина од 2,3 степени, па во Егејското Море кај Света Гора, со јачина од 3,1 степени.
Во текот на денот продолжи серијата земјотреси низ Србија. Тлото се затресе прво во Мајданпек со јачина од 1,8 степени според Рихтеровата скала, потоа во Краљево со јачина од 1,9 и на крајот во Бор со јачина од 1,7 степени.
Во Македонија денеска два земјотреси се случија во валандовско, и тоа во 01 часот и 12 минути беше регистриран земјотрес чиј епицентар се наоѓа 111 km југоисточно од Скопје, во епицентралното подрачје Валандово со Рихтерова локална магнитуда МL3.3 и е почувствуван во Валандово, Богданци и околината со интензитет од три степени според Европската макросеизмичка скала, додека во 01 часот и 14 минути беше регистриран земјотрес чиј епицентар се наоѓа 113 km југоисточно од Скопје, во епицентралното подрачје Валандово со Рихтерова локална магнитуда МL2.2 и е почувствуван во Валандово и околината со интензитет од три степени според Европската макросеизмичка скала.
Во 01 часот и 22 минути беше регистриран земјотрес чиј епицентар се наоѓа во Скопје со Рихтерова локална магнитуда МL2.7 и е почувствуван во Скопје и околината со интензитет од три степени според Европската макросеизмичка скала.
Според сеизмолозите, причина за загриженост нема. Современата технологија на градба не дозволува помали и средни потреси да направат штета или да загрозат човечки животи.
„Земјотресите со јачина од 5,5 степени според Рихтеровата скала во 21 век не смеат да предизвикаат никаква материјална штета, односно да не загрозуваат човечки живот или имот, бидејќи технологијата и методите на градба се толку многу напреднати што можеме да градиме објекти отпорни на ударниот земјотрес и целосно да се заштитиме. Но, имаме и стари згради, кои се изградени пред 1963 година, при чија изградба не се почитувале прописите, а на дел се направени некои интервенции кои дополнително влијаеле на нивната ранливост, вели сеизмологот Бранко Драгичевиќ за српскиот весник Блиц.
Објектите пред катастрофалниот земјотрес во Скопје во 1963 не ги запазувале стандардите за безбедна градба и тие се најподложни на оштетување при земјотреси.
„Не треба да се паничи зашто земјотресот не убива луѓе, убиваат зградите. Ние треба да градиме домови согласно техничките прописи, само така граѓаните ќе бидат безбедни, вели во претходна изјава за Нова Македонија, проф. Др. Влатко Шешов од Институтот за земјотресно инженерство и инженерска сеизмологија – ИЗИИС, при Универзитетот „Св. Кирил и Методиј“ во Скопје.
Но, сеизмолозите предупредуваат дека градбите не се делат само на нови и стари. Проценките се дека во Македонија има речиси 100 илјади дивоградби, во кои не се пресметани објектите со нелегални доградби и надградби, што создава сериозна бројка на објекти кои немаат соодветна документација и претставуваат опасност.
Македонија еднаш горливо го искуси ваквиот пристап. Во катастрофалниот земјотрес во 1963, пред кој немало високи стандарди за сеизмичка безбедност, биле срушени 15.800 живеалишта, а 28 илјади биле оштетени. Како последица на тоа загинале 1.070 луѓе, 2.900 биле повредени, а 800 останале трајно инвалиди.
Некотролираната и нерегулирана градба предизвика хуманитарна катастрофа во Турција во 2023 година, кога земјотресот со јачина од 7,8 степени остави трага на уништување долга 330 километри. Во него загинаа 53 илјади луѓе под рушевините на над 800 илјади објекти, од кои за десетици илјади имаше сомнежи дека се дивоградби и не се градени според стандарди за безбедност.
(M.K.)
