Министерот за внатрешни работи, Оливер Спасовски во однос на тоа до каде е истрагата за лажните дојави за бомби, денеска рече дека е важно да се напомене оти активното постапување на службите, МВР и АНБ за разузнавање и сите што работат за спречување на ваков вид кибер закани, успеале преку промената на протоколите да го прилагодат начинот на работење на службите во настанатата состојба.
– Имавме протоколи и упатства коишто беа пишувани во 90-те години на основа на тогашните можности и искуства. Меѓутоа на пример, електронската дојава не беше воопшто дел од протоколот, туку едноставно само добивањето на информација. Сега протоколот е сообразен со новото време во којшто се земаат сите видови на можност на комуникација и притоа е многу важно што со овие протоколи се цени релевантноста на информацијата односно на веројатноста за евентуална закана. Имаме низок, среден и висок степен на ваква закана која што се оценува и на основа на тоа се постапува. Протоколите се создадени за да можеме да бидеме брзи и ефикасни и протоколите практично не се создадени за да ние скриеме некаква информација, туку едноставно да се постапува и за секое постапување да можеме да ја информираме јавноста – изјави Спасовски.
Тој потсети дека два дена по носењето на новите протоколи имавме дојави, првиот ден во три училишта, а следниот ден уште во едно училиште и тука, како што рече, запре целиот тој процес затоа што од една страна се интензивираа истрагите..
– Тука се работи се уште на вештачење на материјали, бидејќи се навистина големи материјали што треба да бидат завршени со вештачење за да можеме да практично ги прибереме сите докази и за поднесување на кривични пријави. Јас тоа го очекувам во секое време и да можеме тој процес да го затвориме, така што тој дел од постапките којшто овозможи да се обезбедат релевантни докази коишто може да бидат ценети од страна на обвинителството понатаму и во судот се покренати постапки. Имаше сериозен проблем со користењето на т.н. ви-пи-ем адреси коишто создаваа потешкотии во прибирањето на доказите. Како и да е, целосната состојба се стави под контрола и мислам дека на задоволството на сите нас и на граѓаните, и на учениците и на наставниот кадар имаме состојба во која што имаме стабилност и мир, пред се’ спокој на учениците и на наставниците, рече Спасовски во Штип.
©ММС.мк Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. Услови за превземање
Loading ...
