Два месеца по смртоносниот пожар што ја потресе Кочани и цела држава, тим од медицински специјалисти од Скопје заврши сеопфатна евалуација на состојбата на повредените што се лекуваат во Општата болница со проширена дејност во Кочани. Прегледите опфатија повеќе од 110 пациенти, дел од нив повратници од странски болници, а останатите се лица кои биле хоспитализирани во македонски здравствени установи.
Повеќето од пациентите во Кочани продолжуваат со интензивен процес на физикална терапија и третман на изгореници. Од нив, 40 лица добиваат секојдневна физиотерапија со цел намалување на контрактури и подобрување на подвижноста на зглобовите, додека 70 пациенти имаат активни преврски за сериозни изгореници кои бараат внимателно медицинско следење. Лекарите укажуваат дека голем број од нив ќе се соочуваат со долгорочни здравствени последици и дека рехабилитацијата ќе трае најмалку неколку години.
„Станува збор за пациенти со комплицирани повреди, кои не смеат да бидат изложени на сонце, прашина или други надворешни влијанија. Нивниот третман бара строга дисциплина и постојана медицинска грижа“, изјави директорката на болницата, д-р Кристина Серафимова.
Дополнително, лекарскиот тим во наредните денови ќе изготви извештај што ќе ја сумира моменталната клиничка состојба на сите повредени. Овој документ ќе биде клучен за натамошното планирање на медицинската и психосоцијалната поддршка за настраданите.
Во тек е и координација со Министерството за здравство, кое најави дека во следната фаза ќе се разгледаат можности за долгорочна рехабилитација на повредените, вклучително и преку странски центри. Се очекува дел од пациентите да бидат повторно испратени надвор од државата за специјализирани интервенции, особено за реконструктивна и пластична хирургија.
Меѓутоа, покрај медицинските предизвици, болницата во Кочани се соочува со хроничен проблем – недостаток од кадар. Недоволниот број медицински сестри и физиотерапевти го отежнува секојдневното обезбедување на соодветна грижа. За надминување на моменталната состојба, во помош се вклучија и здравствени работници од Штип, меѓу кои и лекари, инструментарки и физиотерапевти.
„Поддршката од Штип значи многу, но за да се обезбеди квалитетен третман за сите пациенти, потребна ни е системска поддршка и нови вработувања“, додава д-р Серафимова.
Граѓаните и институциите продолжуваат да бараат одговорност за трагичниот настан, кој откри сериозни пропусти во безбедносните протоколи и дозволи за работа. Истовремено, борбата за животите и здравјето на повредените останува приоритет, додека нивниот пат кон опоравување допрва започнува.
