Американскиот претседател Доналд Трамп прогласи национална економска вонредна состојба и најави нови царински тарифи, различни за различни земји. За Македонија, царините се во висина од 33 отсто. Од земјите во регионот само Босна и Херцеговина со 35% и Србија со 37% ќе имаат повисоки царини. Албанија, Косово и Црна Гора ја имаат најниската стапка на царина од само 10%.
Од доаѓањето на власт на Трамп, нашиот премиер Христијан Мицкоски, кој три пати беше во САД, изјавуваше дека негуваме засилени односи со новата американска администрација, која одговори со повисоки царини.
Како што објаснуваат извори од Белата куќа, високите царински стапки ќе бидат уште повисоки за 60 земји кои се сметаат за „најлоши престапници“.
Една од највисоките царински стапки од 49% ќе биде наметната на сите увозни производи од Камбоџа. Меѓу другите новонајавени реципрочни царини се 46% за Виетнам, 34% за Кина и 20% за Европската унија.
Некои земји ќе се соочат само со основната стапка од 10 отсто. Меѓудругите, тоа се земји како Велика Британија, Сингапур, Бразил, Австралија, Нов Зеланд, Турција, Колумбија, Аргентина, Ел Салвадор, Обединетите Арапски Емирати и Саудиска Арабија.
Кинеската реципрочна тарифна стапка ќе биде наметната над царината од 20 отсто што Трамп веќе ја наметна, со што нејзината вкупна царина ќе достигне неверојатни 54 отсто. Соединетите Американски Држави увезоа стоки во вредност од 439 милијарди долари од Кина минатата година, што е вториот главен извор на увоз зад Мексико.
А, почнувајќи од 2 мај, тарифната стапка од 54% ќе се применува и за пакетите вредни помалку од 800 долари кои доаѓаат во САД од Кина и Хонг Конг. Ова значи дека Американците кои нарачуваат стоки од кинески компании како AliExpress, Temu и Shein ќе треба да платат 54% повеќе.
Стоките кои подлежат на тарифи низ целиот сектор, како што се челикот и алуминиумот, а наскоро и автомобилите, нема да подлежат на дополнителни реципрочни стапки специфични за земјата. Меѓутоа, во случајот со Кина, секторските тарифи ќе се надополнат на тарифата од 20 отсто што беше во сила пред вчерашното објавување.
Тарифата од 25 отсто за сите автомобили од странско производство ќе влезе на полноќ на 3 април.
Веднаш стигнаа и првите реакции. Шефицата на ЕУ Урсула фон дер Лајен вели дека „последиците ќе бидат страшни за милиони луѓе ширум светот“ и додаде дека Европа го финализира својот прв пакет одговор на царините за челик. Кина вети „одлучни контрамерки“ против овој потег. Канадскиот премиер Марк Карни вели дека е „од суштинско значење да се дејствува со цел и со сила“. Џорџија Мелони ги нарече американските царини „погрешни“ и предупреди дека тие би можеле да предизвикаат трговска војна. Ентони Албанес (Австралија) рече дека „ова не е акт на пријателство“.
Извор: CNN, BBC
