Со синоќешното симболично предавање на клучот од градот на карневалистите од страна на градоначалникот Костадин Костадинов, започнаа осумдневните карневалски празнувања во Струмица. Вкупно 35 карневалски групи ќе продефилираат во сабота низ струмичките улици. Во меѓувреме ќе се одржат повеќе настани, а се очекуваат илјадници гости до Македонија и странство.
-Посакувам да бидете добри домаќини и врати да ви бидат ширум отворени за секој што има добра мисла за Струмица, им порача на своите сограѓани градоначалникот Костадин Костадинов.
Претходно, во текот на денот, на прес конференција беа соопштени деталите за карневалските денови.
Претседателот на Организациониот одбор на карневалот Александар Цицимов, соопшти дека поради совпаѓањето на одржувањето на други карневали со Струмичкиот, годинава се очекува намален број на учество на карневалски групи од странство, но и покрај тоа има учесници од повеќе земји и други градови од државата.
-Имаме гости од Хрватска, Црна Гора, Србија и Бугарија. Ќе имаме вкупно 35 групи и со тоа на некој начин ја означуваме симболиката 35 години од обновената организирана форма на Струмичкиот карневал. Од нив 11 се од странство, 18 се од Струмица и шест од други градови во државата, изјави Цицимов.
Струмичкиот карневал традиционално ја има поддршката на Општината Струмица и е дел од нејзините програми. Градоначалникот Костадинов посака оваа година, како и годините наназад, Струмица да биде полна со луѓе.
-Струмичките угостителски објекти и компании и граѓаните пред се’, да се покажат како добри домаќини и повикувам да уживаме во прекрасните настани поврзани со струмичкиот карневал и денеска во 18 часот ќе го предадеме клучот односно власта од моја страна како градоначалник во рацете на карневалистите. Нека ни е вечен струмичкиот карневал, да знаеме што значи таа традиција, којашто не е само локален идентитет, туку и национален идентитет и овде е поддршката на општина Струмица преку Советот од 3 милиони денари, со тенденција таа да продолжува. И сакам да се заблагодарам за да не биде дека само критикувам, и на Министерството за култура за поддршката, тоа е начинот како треба да функционираме. Нека ни е со среќа струмичкиот карневал, рече градоначалникот Костадинов.
Потврда за интересот за Струмичкиот карневал се исполнетите сместувачки капацитети. Градоначалникот Костадинов испрати порака до градежните компании и инвеститорите за инвестиции во хотелското сместување бидејќи, како што потсети, Советот на општината Струмица донесе одлука за промена на планот за градежно земјиште со којашто комуналиите за хотелско сместување се намалени.
Овој викенд сите патишта ќе водат во Струмица, додека организаторите најавуваат дека на Чист понеделник, ќе биде урнат светскиот рекорд во делење порции со бел град, настан што е во организација на Здружението на угостители од Струмица.
