Лидерот на ДУИ, Али Ахмети по првата изјава дека Артан Груби е на албанска територија, во телевизиска изјава дополнува дека тврдењето го базира на изјавите на владините претставници. Ахмети за РТВ 21 тврди дека нема контакт со Груби.
„Лично немам контакт со Артан Грубин и немам детални информации за неговата моментална локација. Мојот коментар се базираше на она што е јавно објавено од владини претставници, како и на тоа дека тој легално ја поминал границата. Силно верувам дека секој граѓанин, вклучително и г. Груби заслужува правичен и непристрасен судски процес, далеку од селективно спроведување на правдата“, изјави Ахмети за РТВ 21.
МВР на 18 декември ги објави меѓународните потерници издадени по Груб и поранешниот директор на Државната лотарија, Препарим Бајрами. Основниот суд а 17 декември на осомничените им изрече мерка притвор од 30 дена.
Груби и Бајрами се обвинети за „присвојување незаконско богатство“ од Државна лотарија, а причинетата штета се проценува на околу 8,2 милиони евра.
Додека се слушаат јавни обвинувања за тоа кој е одговорен за заминувањето на Груби од земјата кратко пред акцијата, првичната изјава на Ахмети ја следеа повици до Обвинителството да биде повикан да каже каде е поранешниот вицепремиер.
Премиерот Христијан Мицкоски рече дека „на потег е Обвинителството“, а се огласија и од опозициската СДСМ.
„Откако лидерот на ДУИ застана во одбрана на Груби, повеќе од јасно е дека самиот тој е добро информиран за тоа каде е Груби и има важни информации за случајот. Зошто Обвинителството и Тошковски не го повикуваат Ахмети да даде изјава?“, велат од СДСМ.
На повиците одговорија од Обвинителството:
„Домашните и меѓународните органи се задолжени со извршување на тие наредби ги имаат сите овластувања да ги преземат сите неопходни дејствија за трагање по лицето, вклучително и да повикуваат и да вршат разговори со други лица кои би можеле да имаат некои сознанија за локацијата на која се наоѓа осомничениот, соопштија од Јавното обвинителство.
Артан Груби, Васко Ковачевски, Препарим Бајрами се само дел од листата со имиња, предводена од некогашниот премиер Никола Груевски, кои остануваат недостапни за правдата.
