Минатиот месец во државава се евидентирани 195 заболени од грип, 56 нови случаи на ковид-19, две деца со заушки, три лица позитивни на ХИВ и едно со СИДА. Во октомври, најчесто регистрирано акутно заразно заболување се ентероколитите со вкупно 390 пријавени лица, се наведува во најновиот извештај на Институтот за јавно здравје (ИЈЗ), објавен попладнево.
– Во текот на месец октомври, до Институтот за јавно здравје пристигна една пријава за алиментарна епидемија од Центарот за јавно здравје – Штип. На 8 октомври, ЦЈЗ – Штип пријави епидемија на алиментарна токсоинфекција. Епидемијата е пријавена со шест заболени лица, сите од исто семејство, кои консумирале подготвени слатки производи набавени од иста продавница. Епидемиолошката служба при ЦЈЗ – Штип, во соработка со Агенцијата за храна и ветеринарство и Државниот санитарен и здравствен инспекторат, изврши санитарно-хигиенски и епидемиолошки увид во објектот, каде била продавана сомнителната храна, пишува во билтенот за движењето на заразните заболувања за октомври.
Земени биле материјали за микробиолошка анализа од: мостри храна – затекната на денот на увидот, брисеви од работни површини и брисеви од раце, нос и грло на вработените.
– Кај две од заболените лица е докажана salmonella enteritidis во фецес. Од страна на ЦЈЗ – Штип предложени се соодветни санитарно-хигиенски и против епидемиски мерки. Објектот беше затворен сé до добивање негативни резултати од земените материјали. Епидемијата е одјавена на 25 октомври, се додава во билтенот.
Во текот на октомври, регистрирани биле два случаја на заразни заушки. Првиот случај било дете на возраст од 12 години од Охрид, редовно вакцинирано согласно календар за имунизација, а дијагнозата била поставена клинички. Вториот случај било шестгодишно дете вакцинирано со една доза МРП вакцина, од Скопје, а дијагнозата била лабораториски потврдена.
– Во вкупниот број на пријавените случаи на вакцино-превентабилни болести, 78,6 отсто се случаи на голема кашлица, како резултат на тековната епидемија на територијата на град Скопје, Куманово и Тетово. Во текот на месец октомври, регистрирани се случаи на територија на пет ЦЈЗ/ПЕ низ државата, појаснуваат од ИЈЗ.
Пријавени биле вкупно 56 случаи на Ковид-19, а кај групни пријави за заболени од грип – заболувања слични на грипот, пријавени биле вкупно 195 заболени лица.
Регистрирани биле три случаи потврдени на ХИВ и еден на СИДА – лица на возраст од 45 до 49 години.
Во групата на сексуално и крвно преносливи инфекции, без ХИВ/СИДА, биле регистрирани 11 заболени лица – пријавени седум случаи на вирусен хепатитис Б, три на сифилис и една инфекција со хламидија.
