Градоначалникот на општина Карпош и претседателски кандидат Стевчо Јакимовски се пожали дека неговиот син и снаата, наместо извод од Матичната книга на венчаните лица, добиле извод од Книга на умрените и денот на нивната венчавка е впишан како денот на нивната смрт.
„Скандал. Од црн по црн хумор. Замислете, мојата снајка и мојот син побараа извод од Матичната книга на венчаните, чекаа два и пол часа и го добија овој извод. Извод од Матичната книга на умрените. Денот на нивната венчавка е впишан како ден на смртта. Овие млади луѓе се во шок, можете да замислите секоја годишнина од бракот на што ќе ги потсетува“, вели Јакимовски.
На овој документ, вели Јакимовски е потпишана Дијана Антониевиќ, веројатно, како што додава, кадар на СДСМ или на ВМРО-ДПМНЕ.
„Економските причини за иселување веќе не се оние што ги бркаат младите. Се давиме во хаос на секое поле. Со вакви перспективни и талентирани кадри се наполнети и држвната и јавната администрација. Имаме илјадници црни хумори со партиски кадри на ВМРО-ДПМНЕ или на СДСМ и што е најбитно и ним не им чини администрацијата во зависност дали се власт или опозиција. Малку останавме политичари од Титово време што знаат како функционирала државата, сè друго е резултат на 20 кампањи и лепење плакати“, рече Јакимовски.
ВИДЕОТО може да го погледнете на овој линк.