Енергетските проекти можеме и мораме да ги реализираме со сопствени сили. Тие мораат да бидат наши македонски, со цел да се зајакне енергетскиот суверенитет на Македонија, како еден од клучните фактори за нејзиниот државен суверенитет, порача Атанаско Тунески, универзитетски професор во денешното гостување на „Стадион“.
- Не сум посакуван за партиите кои се на власт, бидејќи сите работат за остварување на сопствен интерес, а не за интересот на граѓаните и државата. Сепак, повторно ќе кажам дека со предлог законот за реализација на стратешкиот инвестиционен проект Милитинеос, односно нова когенеративна централа во Скопје ако се дозволи да помине, грчкиот инвеститор ќе добие државна помош од 50 милиони евра, гарантиран откуп на струја без процес на јавна набавка. Поради тоа земјава ќе губи годишно до 15 до 35 милиони евра затоа што ќе бидеме обврзани струјата да ја купуваме од Милитинеос со цени кои би биле значително повисоки од берзанските. Нашата земја ќе плаќа и 10 пати повисоки маржи од нормалните за производство на струја и топлина, а исто предвидени се и бројни пенали што земјава ќе мора да му ги плаќа на Милитинеос ако не исполни некоја од своите обврски, алармриа Тунески.
Постојат одлуки за кои последиците се краткорочни, но постојат и одлуки каде последиците се долготрајни и ги засегаат нашите поколенија. Набројаните штетни одредби се загрижувачки за енергетиката во Македонија која е столб на социјалната сигурност на населението и предуслов за развој на македонската економија, изјави Туневски.
Целосната дебата со Виктор Андонов и Атанаско Тунески може да ја проследите во најновото издание на “Стадион” на Канал 77.