Студиото „Лајонсгејт“ откри дека биографскиот филм за Мајкл Џексон, наречен „Мајкл“, ќе има премиера на 18 април 2025 година, пишува The Hollywood Reporter.
Филмот ќе го режира Антоан Фукуа, режисерот на трилогијата „Еквалајзер“. Кралот на попот ќе го игра неговиот внук Џафар Џексон.
Филмот е продуциран од Џон Бранка, Џон Меклејн и Греам Кинг, продуцент на биографскиот филм „Боемска рапсодија“, добитник на Оскар во 2018 година. Сценариото за филмот за животот на Мајкл Џексон го напиша Џон Логан, сценарист на филмовите „Гладијатор“ и „Авијатичарот“.
Според „Лајонсгејт“, филмот ќе ги следи сите аспекти од животот на популарниот музичар, но не е познато дали ќе допре до контроверзните наводи за сексуална злоупотреба на малолетници. Последниот филм што ги истражи обвинувањата против Мајкл Џексон беше документарниот филм на HBO од 2019 година, „Leaving Neverland“.
Официјалниот синопсис на биографскиот филм гласи:
„Мајкл ќе ѝ донесе на публиката неверојатен и искрен портрет на брилијантниот, но комплициран човек кој стана крал на попот. Филмот ги прикажува неговите триумфи и трагедии на епско, филмско ниво – од неговата човечка страна и личните борби на неговиот непобитен креативен гениј, нагласен преку неговите најпознати изведби“.
„Публиката ќе го доживее, како никогаш досега, внатрешниот свет на еден од највлијателните пионери на музичката уметност што светот некогаш ги познавал“.
Снимањето на биографскиот филм ќе започне на крајот на јануари 2024 година.
