Во близина на селото Жировница, изутрината ренџерската служба на Националниот парк „Маврово“ пронашла отстрелани мечка со две мали мечиња. Случајот е пријавен до сите надлежни институции, кои во моментов се на терен.
Полицијата прави увид, по што се очекува да се утврди дали се работи за намерен отстрел или нешто друго е во прашање.
Од Националниот парк „Маврово“ не сакаа да откријат детали за случајот додека не биде завршена истрагата.
Случајот на денешната прес конференција го објави директорот на Државниот инспекторат за заштита на животна средина Сретен Стојковски.
Од ДИЖС информираа дека на терен е виш инспектор, и заедно со колегите од Агенцијата за храна и ветеринарство и останатите надлежни инспекторати работат на утврдување на причините за смртта на мечките.
Националниот парк „Маврово“ е природно живеалиште на кафеавата мечка, животно под трајна заштита на државата и не смее да се лови.
Неодамна жителите на Галичник јавно се пожалија дека мечки слободно шетаат по селото и побараа интервенција од државата, стравувајќи за животот на луѓето.
фото: Национален парк Маврово
