Чеченскиот лидер, Рамзан Кадиров ги обвини украинските разузнавачки служби и чешката полиција дека организирале киднапирање на еден од неговите омилени коњи за откуп. Зазу, 16-годишен чистокрвен англиски коњ во сопственост на Кадиров, беше украден од штала во чешкото село Крабчице во март годинава.
Кадиров во денешната објава на Телеграм рече дека украинските разузнавачки служби го контактирале „преку трето лице“ по инцидентот, нудејќи му да му го вратат коњот во замена за 18.000 долари.
„Тие знаеја за мојата приврзаност кон пастувот и не погрешија. Се разбира, се согласив (да платам)“, напиша тој, според „Москва тајмс“.
Зазу, кој Кадиров наводно го купил во 2012 година, е запленет заедно со другите европски имоти на Кадиров од 2014 година како дел од европските санкции наметнати на чеченскиот лидер за неговата наводна улога во широко распространето кршење на правата.
Санкциите го спречија Зазу, некогаш познат коњ во светот на трките, да се натпреварува. Коњот на Кадиров практично остана затворен во чешките штали заедно со неколку негови други коњи за тркање.
„Искрено кажано, се надевав дека Зазу ќе биде официјално предаден, дека ќе му бидат укинати санкциите и сето тоа. Но (украинската) разузнавачка служба едноставно го организираше неговото киднапирање заедно со чешката полиција“, опиша тој.
Чеченскиот лидер потврди и дека испораката на коњот е во тек.
„Мои пријатели, ако ви треба нешто испорачано од Европа – само побарајте помош од украинските разузнавачки служби“, се пошегува тој, пренесува Индекс.хр
