Со оглед на тоа што топлотниот бран моментално го погодува поголемиот дел од светот, експертите предупредуваат за важен здравствен проблем за луѓето што земаат одредени лекови. Лекарите често нè потсетуваат на опасностите од топлината во ова време од годината, но овој пат фокусот е на лековите што се издаваат на рецепт, пренесува индекс.хр.
Некои лекови ја губат својата ефикасност ако се изложени на високи температури или сончева светлина. Исто така, постојат лекови што го прават телото почувствително на топлина или сонце.
д-р Ниш Шах објаснува како одредени лекови ја намалуваат способноста на телото да ја регулира температурата, зголемувајќи го ризикот од топлотна исцрпеност и топлотен удар. Други ја зголемуваат чувствителноста на кожата на сонцето, што може да доведе не само до изгореници, туку и до подлабоко оштетување на кожата.
Лекови чувствителни на високи температури
Високите температури и влажноста можат да влијаат на ефикасноста на многу лекови, дури и кога не е особено сончево. Меѓу нив се:
Диуретици – го зголемуваат излачувањето на урина и можат да предизвикаат дехидратација.
Лекови со ГЛП-1 – познати и како лекови за слабеење; можат да го намалат чувството на жед.
Антихолинергици – го намалуваат потењето, што го отежнува ладењето на телото.
Бета-блокатори – го забавуваат срцето, што може да ја ограничи способноста на телото да ја регулира температурата.
Стимуланси – го забрзуваат метаболизмот и го зголемуваат загревањето на телото.
Антидепресиви – можат да влијаат на хипоталамусот и да го намалат потењето.
Лекови кои ја зголемуваат чувствителноста на сонце
Покрај тоа што топлината е опасна, сончевата светлина во комбинација со одредени лекови може да го зголеми ризикот од оштетување на кожата:
Антибиотици (како што се доксициклин, ципрофлоксацин и сулфонамиди) – можат да предизвикаат кожни реакции на УВ зраци.
Нестероидни антиинфламаторни лекови (НСАИЛ, како што е ибупрофен) – можат да предизвикаат фототоксични реакции.
Диуретици, особено тиазиди – го зголемуваат ризикот од фотосензитивност.
Ретиноиди – ја разредуваат кожата и ја намалуваат природната УВ заштита.
Антидепресиви – некои можат да ја зголемат чувствителноста на кожата на сонце.
Лекарите препорачуваат во текот на топлите месеци редовно да се посетува стоматолог или лекар кој ја следи терапијата, ги одржува лековите на пропишаната температура, пие доволно течности и избегнува директна сончева светлина секогаш кога е можно.
