Министерството за образование во 20 општини веќе го заврши процесот на оптимизирање на училиштата, со целосно затворање или префрлање на малкуте ученици од подрачните во централните училишта. Тече процесот и во другите општини, вели министерката за образование и наука Весна Јаневска.
-Не можам да ви дадам точна бројка, бидејќи не е едноставно. Ако едно приградско училиште е оддалечено 30 километри од централното, нема да се затвори, дури и ако има само еден ученик. Тој ученик има право на образование. Но, ако е оддалечено 2,5 или 3 километри и таму учат само 15 ученици, тие ќе бидат префрлени во централното училиште. Ова е сериозен процес. Досега се оптимизирани 20 општини, а во моментов се работи и понатаму“, изјави министерката Јаневска во интервју за Радио Слободна Европа.
На прашањето дали ова значи дека училиштата во тие 20 општини се затворени или се очекува да бидат затворени, таа дополнително го објасни процесот. Таа препорача градоначалниците на општините што имаат празни училишта да ја разгледаат можноста за повторна употреба на зградите.
„Не, тоа значи дека веќе се оптимизирани. Одреден број училишта се затворени. Не ме сфаќајте буквално, но мислам дека околу стотина приградски училишта веќе се затворени. Некои се затворени дури и пред да го започнеме процесот, бидејќи таму нема повеќе деца. Зградите се едноставно празни. Им препорачувам на градоначалниците на општините да најдат нова намена за тие објекти. Нема да имаат проблем со нас. Тие не се погодни ниту за градинки, бидејќи нема деца – но можат да се користат за нешто друго… можеби дом за стари лица, можеби клуб или нешто друго“, рече Јаневска.
Во изминатите 10 години се затворени 42 училишта поради тоа што нема деца. Дополнително, само во текот на оваа година се затворија уште петнаесетина други. Училиштата со малку ученици се главно во руралните области на регионите, каде што комбинираните паралелки понекогаш содржат само 4 до 10 ученици. Демографите забележале дека во повеќе од 60% од општините, стапките на наталитет се негативни и има емиграција на младото население – што дополнително го намалува бројот на ученици во локалните училишта.
