Техниката, развиена од британски научници, ги комбинира јајце-клетката и спермата на родителите со втора јајце-клетка од донор. Методот е законски одобрен во Велика Британија повеќе од една деценија, но сега за прв пат има докази дека се реодени деца без неизлечиви митохондријални заболувања.
Митохондријалните заболувања, кои се пренесуваат од мајка на дете, често доведуваат до инвалидитет или смрт во рок од неколку дена по раѓањето. Децата родени преку овој метод наследуваат поголем дел од својот генетски материјал од своите родители, но добиваат и мал процент (околу 0,1%) од донаторот, кој се пренесува на следните генерации.
До денес, 22 семејства ја поминале процедурата во Центарот за плодност во Њукасл, каде што се родени четири момчиња и четири девојчиња, вклучувајќи и еден пар близнаци. Сите бебиња се здрави и се развиваат нормално.
Освен некои компликации, како што е случај на епилепсија што се решила и дете со аритмија што било успешно лекувано, тие не се поврзани со методот или со митохондријална болест.
Резултатите покажуваат дека во пет случаи не се откриени дефектни митохондрии, додека во три имало мал процент, далеку под прагот што предизвикува болест.
Велика Британија беше првата земја што го разви и легализираше методот, и покрај етичките забелешки поради трајната промена во генетскиот материјал.
„Само овде може да се случи ова. Имаме осум здрави деца без митохондријални заболувања, резултат на научна извонредност и соодветно законодавство“, изјави професорот Сер Даг Тернбул, од Универзитетот во Њукасл.
Според Лиз Кертис, основач на добротворната организација „Фондација Лили“, ова е првата вистинска надеж за многу семејства да го прекинат циклусот на оваа наследна болест.
