Доналд Трамп во моментов зборува пред своите приврзаници во Флорида, прогласувајќи, како што рече, „политичка победа“ и им се заблагодари што го избрале за свој 47-ми претседател.
Трамп рече дека ова ќе биде „златното доба“ на Америка.
„Ова е величествена победа за американскиот народ, која ќе ни овозможи повторно да ја направиме Америка голема“, додава тој, користејќи го својот слоган и фраза на кампањата.
Трамп прогласи победа, иако сè уште не ги постигнал официјалните потребни гласови од изборниот колеџ. Му недостасуваат уште четири гласови од изборниот колеџ.
Трамп на сцената застана со неговиот потпретседател Џеј-Ди Венс, неговата сопруга Меланија Трамп и персоналот во кампањата.
Американците избираат претседател по 60-ти пат во историјата, а целиот свет го чека исходот кој ќе влијае на голем број глобални конфликти и кризи.
Во исто време се избира и нов состав на Конгресот и третина од Сенатот.
Резултатите главно се во согласност со очекувањата. Трамп ја задржа контролата врз традиционално републиканските држави, додека Харис ги освои демократските упоришта.
Трамп, кој според проекциите на Си-Ен-Ен досега освои 246 електорски гласови, победи во Мисури, Оклахома, Алабама, Флорида, Тенеси, Западна Вирџинија, Индијана, Кентаки, Јужна Каролина, Арканзас, Тексас, Вајоминг, Јужна Дакота, Северна Дакота, Мисисипи, Луизијана, Охајо, Канзас, Монтана, Јута, Ајова, Небраска, Ајдахо, Џорџија и Северна Каролина.
Харис, која досега има 182 електорски гласови, победи во Масачусетс, Мериленд, Вашингтон ДЦ, Вермонт, Делавер, Роуд Ајленд, Илиноис, Њујорк, Колорадо, Калифорнија, Орегон, Вашингтон, Конектикат, Вирџинија и Хаваи.
Потребни се најмалку 270 електорски гласови за победа на претседателските избори.
Асошиејтед прес беше меѓу првите што ја објави победата на Трамп во Северна Каролина. Како што објаснија, Трамп во моментот на објавувањето водел со повеќе од 130.000 гласови, а речиси 90 отсто од гласовите беа преброени.
„Во споредба со изборите во 2020 година, одѕивот на гласачите се зголеми во многу области што ги освои тогаш Трамп, а се намали во многу области во кои победија демократите“, објасни АП. Трамп и пред четири години славеше во Северна Каролина.
Според податоците на Би-Би-Си, Трамп моментално води во сите седум колебливи држави. Во Аризона, разликата меѓу него и Харис е многу мала, 49,8 отсто наспроти 49,4 проценти. Првата колеблива држава, Северна Каролина, ја освои Трамп. МИА
