Дали учениците основци би требало да носат униформи? Кога последен пат сте носеле униформа? Дали униформите треба да си ги плаќаат родителите или сите граѓани од буџетот? Кој треба да одлучува за униформите – децата, родителите или градоначалникот? Дали носењето униформи ќе придонесе за поголем успех на учениците?
На овие прашања одговараа жителите на нашиот главен град, на анкетата што ја спроведе екипата на Внимание, внимание, откако дел од Скопските градоначалници ја актуелизираа темата за воведување униформи во училиштата.
Повеќето од граѓаните кои беа дел од анкетата рекоа дека се против воведување униформи во училиштата.
Некои укажуваат дека „секој има право и слобода да носи што сака“, дека униформата ја одзема „автентичноста на личностите“, а други укажуваат дека „облеката не го прави човекот“.
Повеќето сметаат и дека носењето униформа е нешто што припаѓа на далечното минато.
Според мислењето на повеќето од анкетираните, во одлуката за носење не треба да учествуваат родителите, или училиштето, или градоначалниците, туку пред се, самите ученици. Доколку учениците си донесат таква одлука, повеќето граѓани сметаат дека униформите треба да бидат плаќани од буџетот на школите или граѓаните.
Најголемиот дел од испитаниците сметаат дека носењето униформи не придонесува за поголем успех на учениците и не може да влијае на истиот.
Анкетата „Внимание, внимание – зборуваат граѓаните“, се емитува на каналите на „Трн“ (на Фејсбук, YouTube, и на Инстаграм) и нејзината цел е да се чуе гласот на граѓаните, посебно на младите. Гласот на граѓаните нѝ го претставува артистот Дениз Абдула, а продукцијата е на „Трн.мк“.