Од почетокот на годинава во Јапонија се регистрирани 977 случаи на синдром на стрептококен токсичен шок (STSS), што ја надмина минатогодишната бројка од околу 940 случаи. Најсилно беше погодено урбаното население во Токио.
Овој синдром е предизвикан од невообичаеното однесување на инаку вообичаената бактерија стрептокока А, која латентно инфицира пет до 20 отсто од возрасната популација.
Сепак, инфекцијата со оваа бактерија може да напредува до бројни болести, од тонзилитис и импетиго до шарлах и пневмонија. Во некои случаи, бактеријата може да стане инвазивна и да стигне до мускулите и меките ткива преку рани и исеченици, кои потоа почнуваат да јадат, предизвикувајќи некротизирачки фасциитис.
Токму оваа состојба се шири во Јапонија, покажуваат податоците на Националниот институт за заразни болести.
Состојбата започнува со треска и болки во мускулите, проследени со низок крвен притисок, откажување на органите и септичен шок. Состојбата може да биде фатална доколку лицето не се лекува навреме со антибиотици.
Повеќето од заразените се постари од 30 години, а стапката на смртност останува околу 30 проценти. Во Токио, 145 луѓе развиле некротизирачки фасциитис од почетокот на годината, пишува Телеграф.
Британскиот научник и епидемиолог Џон Коен објасни дека не е невообичаено да се забележат такви скокови во бројот на случаи: „Објаснувањето можеби е нов бактериски сој, но често не можеме со сигурност да кажеме која е причината освен локалната инфекција“.
Светската здравствена организација издаде предупредување пред две години откако се зголеми бројот на инвазивни инфекции со стрептокока А во Велика Британија, Франција, Ирска, Холандија и Шведска. Во тоа време повеќето од заразените беа деца.
