Во најновото издание на поткастот „Да не се лажеме со Хаџи Јанев“ гостуваше Кирил Барбареев, професор на Факултетот за образовни науки при Универзитетот „Гоце Делчев“ – Штип. Овојпат за тема на дискусија се постави улогата на образованието во заштита на правата на детето.
Според Барбареев, глобализацијата носи огромна миграција во светот, размена на култури и традиции, а особено го наметна трендот да се живее во време на пари, моќ и профит, кои важат како сериозни моменти од секојдневието на луѓето, но и кои особено се одразуваат на динамиката и животот на новите генерации, што според него, тоа е концептот на либералната демократија.
- Денес ако немате пари ќе страдате, младите се соочуваат уште од најрана возраст со влијанието и моќта на профитот, живеат во материјален свет. Во изминатите 30 до 40 години, ваквиот начин на живот се наметнува како многу главно прашање, па сега постои огромен јаз помеѓу материјалното и духовното! Некогаш пионерските домови нудеа корисни содржини за најмладите, а сега тоа е многу загубено. Денес ако немате пари не можете да го пратите вашето дете да спортува, да се образува или на било кој начин да се анимира. Сегашното образование ги приморува учениците да одат на дополнително образование и едукации, кои повлекуваат дополнителни трошоци за родителите. Истражувањата покажуваат дека 60% од децата одат на дополнителни часови после наставната програма во училиштето, а со цел да добијат поглемо знаење за поголеми успеси. Сето ова сведочи за низа на пропусти во државната образовна стратегија, вели Барбареев.
Како што кажа тој, земјава се наоѓа во оваа состојба откако државните власти ги заборавија вистинските вредности, не успевајќи да ги имплементираат успешните програми од претходниот модел на образование во периодот на 90-те години.
- За жал нема свест за овие теми, државата во овие 30 години го има загубено дијалогот со младите луѓе. Тие се во фаза на тотална дезориентираност, имајќи в предвид дека изгубениот дијалог на релација со младите луѓе значи дека тие не се важни за ова општество. Токму поради ова, час побрзо образованието мора да се трансформира, бидејќи државата дијалогот со новите генерации треба да го има единствено преку образовните институции. Неопходно е да го неутрализираме синдромот дека знаеме сè, без да се погледнеме во огледало и да ги регистрираме системските слабости во земјава. Новите реформи треба образованието и младите да ги тргнат од сенката на политиката, но и да поттикнат да се соочиме со сопствените слабости, алармира професорот на Факултетот за образовни науки.
Целото интервју со професорот Кирил Барбареев може да го проследите денес со почеток од 18 часот на „Јутјуб“ профилот на Канал 77.