Македонија напредувала за едно место на листата на земји на организацијата Фридом хаус, но и натаму е оценета ка делумно слободна земја. Во денеска објавениот извештај за слободата во светот, Македонија има 68 бода од можни сто. За илустрација, земјата лани беше оценета со 67, во 2021 година 66, додека во 2020 година – 63.
Извештајот за слободите во 2022 година забележува два бода повеќе во политичките права, додека бодовите за граѓанските слободи останале исти – 39.
Во текот на денот се очекува објавувањето на одделниот извештај за Македонија, со детали за секоја од областите.
Генерално, во новиот извештај на Фридом хаус се нотира дека шест земји доживеаја пад на нивните политички права и граѓански слободи, шест други направија подобрувања. Европската унија беше втурната во скандали со шпионски софтвер во 2022 година, откако мобилните уреди на новинари и политичари беа под надзор во Шпанија, Грција, Унгарија и Полска.
Најголемиот едногодишен пад во регионот се случи во Унгарија, која е оценета делумно слободна и изгуби 3 поени на скалата од 100 точки на Freedom in the World , за нов збирен резултат од 66.
Најголемо едногодишно подобрување имаше Словенија, која е означена како Слободна и доби 5 поени, за нов збирен резултат од 95.
Финска, Норвешка и Шведска имаат највисоки збирни резултати во регионот и во светот. Сите добија 100 поени и се оценети како слободни земји.
Турција, со 32 поени, е означена како неслободна и има најлоша збирна оценка во регионот.
Србија е на 16-то место меѓу земјите со драматичен пад на слободата во последните 10 години, со пад од 18 бода и се наоѓа меѓу Авганистан и Мјанмар. Но, сепак се смета за делумно слободна земја, Косово е исто така во групата на делумно слободни земји, но бележи позитивно поместување во 2022 година.
Извештајот – Слобода во светот 2023: одбележување 50 години во борбата за демократија – открива дека мирот и слободата во регионот се загрозени не само од инвазијата на Москва на Украина, туку и од серија важни избори кои го сигнализираа растечката сила на десничарските популистички партии, кои често се оддалечуваат од демократските принципи и бараат соработка со авторитарните сили.
фото: Freedom house
