Отворен ден имаа денес средните општински училишта во Штип, каде пред учениците од основните училишта, беа претставени струките, профилите, како и вештините со кои ќе се стекнат идните средношколци во текот на понатамошното образование.
Актуелниот тренд на намалување на бројот на ученици во средните училишта се очекува да продолжи и годинава со што се чини овој пат најпогодено ќе биде средното медицинско училиште Јане Сандански.
Според зборовите на директорката Марија Николиќ, основна причина за тоа е се поголемиот број на отворени здравствени струки во средните училишта во околните градови.
- Последните три години се отворени паралелки од здравствена струка во гимназиите, во техничките па дури и во земјоделските училишта што секако доведува до дисперзирање на учениците и со тоа намалување на бројот на ученици во нашето училиште, вели Николиќ.
После долги години, годинава повторно ќе се запишуваат средношколци и во профилот гинеколошко-акушерска сестра истакна директорката Николиќ , додавајќи дека ова училиште е единствено на територијата на општина Штип во кое сите паралелки се во групата на дуално образование, односно паралелки со зголемен број на часови со практична настава.
Дуално образование во насоката техничар по изработка на облека најавуваат и од средното општинско училиште Димитар Мирасчиев. Доколку се одлучат за ова училиште идните средношколци ќе можат да ги одберат уште и насоките техничар за дизајн и техничар за моделирање на облека, како и конфекционер со три годишно образование, рече Марина Варадиновска, директор на училиштето.
Пред учениците од основните училишта се претставија уште и средното општинско училиште гимназија Славчо Стојменски како и Електро машинскиот училишен центар Коле Нехтенин, кои квалитетот на образованието пред се, го наведоа како клучна причина зошто идните средношколци би требало да се одлучат своето образование да го продолжат токму овде.
