Припадник на шпанската Цивилната гарда, агенцијата за јавна безбедност, е осуден на 15 месеци затвор за објава на лажна вест на Твитер пред три години за наводен напад на малолетен мигрант врз жена. Лажната вест е проследена со видео снимка на силување од Кина и нема врска со Барселона, за каде сега осудениот гардист, тврди дека настанот се случил.
Обвинението прецизира дека тој објавил видео од брутален напад врз млада жена на 1 јули 2019 година , проследено со вест дека станува збор за снимки од силување што неодамна се случило во Кан де Мар, Барселона.
Видеото, кое било прегледано 21.900 пати, во неполна минута прикажува маж како брутално напаѓа жена, ја удира со клоци и тупаници, по што се обидува да и’ ги спушти панталоните за на крајот да ја фати за коса и да ја влече на земја. Во твитот во прилог на видеото, гардистот со погрдни зборови укажува дека силувањето е дело на „лудаци и стада Мароканци“. Осуден е за кривичното дело против основните човекови права – „повредување на достоинството на луѓето поради дискриминаторски причини“.
Ова е првата пресуда за објавување лажна вест во Шпанија. Обвинителството соопшти дека обвинетиот бил мотивиран од неговото непријателство кон странски имигранти од мароканско потекло. Сега осудениот го признал делото, откако претходно со судска наредба избра два свои профили на Твитер и Фејсбук и еден на Инстаграм. Овие профили, гардистот ги користел во текот на 2019 години за да шири ксенофобични објави и искривени или лажни информации за имигрантите. Сега осудениот го признал делото, по што судот изрече условна казна затвор. Судот му изрече двегодишна забрана на социјални медиуми, парична казна од 1620 евра, да следи курс за недискриминација, а покрај ова, гардистот пет години не смее да врши образовни и спортски активности.
Засиленото внимание против дезинформациите и лажните вести настана во текот на пандемијата, откако Државното правобранителство преку својот Технички секретаријат подготви извештај во кој, како кривични дела ги класифицира лажните вести или измами во контекст на здравствената вонредна состојба. Документот, познат како El Confidencial, анализира најмалку десетина кривични дела содржани во Кривичниот законик, а кои можат да настанат со несоодветна употреба на Интернет и социјалните мрежи. За овие дела, законите предвидуваат парични казни и казни кои вклучуваат и затвор.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
