Доцна вечерва на локалниот пат Тетово – село Непроштено патничко моторно возило удрило во млада мечка која го минувала патот заедно со една значително поголема мечка и уште две помали мечки, информираат од ЦУК.
– Во возилото кое удрило во мечката се наоѓало петчлено семејство, татко, мајка и три мали деца. Од ударот сите биле под голем стрес, а децата се здобиле со лесни повреди. Мечката во која удрило возилото била повредена, на почетокот безмалку неподвижна, а потоа со ограничени движења. Околу еден час подоцна почнала да се движи и постепено се оддалечила од местото на несреќата, се вели во информацијата од ЦУК.
Од ЦУК велат дека веднаш откако на бројот 112 добиле пријава за сообраќајна несреќа во која е повредена мечка, испратиле известување до сите потенцијално надлежни институции.
– Екипи на МВР извршија увид и го обезбедија местото на несреќата. Во овој момент големата мечка, најверојатно мајка на мечињата, со двете помали мечиња се наоѓа одедна страна на патот,, додека повредената млада мечка се наоѓа од другата страна, се вели описно и детални во информацијата на ЦУК.
-Се работи за урбана средина со повеќе куќи и голема раздвиженост на возила и луѓе поради што ги повикуваме надлежните институции да ги презедат сите неопходни дејствија со кои ќе се гарантира безбедноста на граѓаните, но воедно ги повикуваме и невладините организации од оваа област да се вклучат во овој несекојдневен настан и да предложат мерки и постапки со кои ќе им се помогне на повредената млада мечка како и на големата мечка со двете останати млади мечки. Ги предупредуваме граѓаните да го избегнуват движењето на местото на несреќата како и непосредната околина или да бидат исклучително внимателни бидејки се очекува мајката да го бара своето младенче, предупредуваат од ЦУК.
Од ЦУК информираат и дека рано наутро ќе патролираат екипи на Националниот парк Шар Планина. -Овој случај отвора многу прашања околу непрецизно дефинираните и испреплетени надлежности на институциите бидејки по несреќата ја разгледувавме можноста повредената млада мечка (или мече) да биде успиена со опојно средство, а потоа преместено и згрижена на соодветно место, како на пример ЗОО Скопје, каде би и се пружила медицинска нега. Притоа до израз дојдоа повеќе формално-правни и функционални недостатоци, велат од ЦУК.
