Македонскиот премиер Димитар Ковачевски во интервју за емисијата „Hardtalk“ на Би-Би-Си вели дека третите земји, вклучително и Русија, отсекогаш имале свој интерес да имаат замрзнат конфликт на Балканот. Тој додава дека од временска перспектива, има земји каде што се врските и јавното мислење е посилно кон Русија на Балканот и има земји каде ова мислење и ова влијание се помалку значајни.
Во интервјуто премиерот вели дека во Северна Македонија инфраструктурата на ова влијание, кое со текот на времето стануваше сè посилна, била поставена во периодот на нашиот прием во НАТО. Истата инфраструктура била засилена за време на почетокот на ковид пандемијата, кога од ЕУ немало можност да достави вакцини против ковид-19.
Ковачевски вели дека станува збор за медиумска, политичка и аналитичка инфраструктура во земјава, при што некои опозициски партии се под влијание, па дури и одат на состаноци во Русија и имаат политичка програма која е на линија со нивните руски политички партнери.
Исто така, имаме медиуми кои биле под влијание на трети страни, меѓу кои веројатно има и руско влијание, вели Ковачевски.
Појаснувајќи дека станува збор за создавање на хистерија, Ковачевски додава дека оваа инфраструктура потоа била силна и при нашиот почеток на преговорите со ЕУ, „кога сите граѓани можеа да ги видат протестите на скопските улици, кога беа употребени молотови коктели, нападот на зградата на Министерството за надворешни работи и слични инциденти“.
Премиерот Ковачевски рече дека сите политички партии имаат одговорност да носат одлуки кои ќе донесат подобра иднина за идните генерации.
Ние имаме два концепти во државава. Едниот концепт, кој јас го водам, е дека Македонците и сите други граѓани на Северна Македонија, со кренати глави, со достоинство, треба да седнат на големата маса во Брисел и да го кажат својот став за сите прашања, да преговараат и да станеме членка на ЕУ. Другиот концепт е со лажно достоинство, да седнат на малата маса тука, во Северна Македонија, сами, изолирани, во конфликт со соседите, без разговори со ЕУ. Ова седење на мала маса, со лажно достоинство, го гледавме со години, вели Ковачевски.
Тој вели дека на крајот овој процес ќе биде тежок, преговорите ќе бидат мачни, а сите граѓани се свесни за тоа, но наградата е членство во ЕУ.
Македонските граѓани сакаат да бидат дел од ЕУ, сакаат да живеат во ЕУ, но во нивната држава тука, а не да ја напуштат нивната земја и да работат во земјите членки на ЕУ, подвлече премиерот Ковачевски.
Ковачевски додаде дека најлесно е да се биде политичар кој зборува за минатото, бидејќи како што рече „кога зборувате за минатото, не ветувате ништо, само играте со емоциите на луѓето, а тешко е да се биде политичар кој зборува за иднината, зашто тогаш давате ветување“.
Премиерот Ковачевски се осврна и на договорот со ФРОНТЕКС на македонски јазик кој неодамна го потпиша министерот за внатрешни работи Оливер Спасовски.
Во овие преговори ние имавме неколку цели и ги постигнавме. Прво: чист македонски јазик во ЕУ. Второ: чист македонски идентитет, на Македонците и почеток на преговорите со ЕУ што и се случи на 19 јули. Дополнително, историските прашања да бидат надвор од преговарачката рамка. Ја споменавте работата на историската комисија, рече премиерот Ковачевски.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
