Плач и мртва тишина се мешаа на „Маршот на Ангелите“, траорниот марш на семејствата на загинатите деца во Кочани, на кои им се придружија и граѓаните во нивната тага. Црната поворка помина низ центарот на градот, додека црнилото единствено го нарушуваа сестринска капа од сликата на загината матурантка и насмејаните ликови на децата што повеќе ги нема, кои загинаа во кобниот пожар во дискотеката „Пулс“ на 16 март.
„Коруптивниот систем ги уби нашите деца“, „Стоп за селективната правда“,„Ова не е несреќа, ова е убиство“, „Марш за 59-те ангели“, „Убијци, убијци“. Тоа беа пораките од транспарентите во рацете на браќата и сестрите, мајките и татковците на загинататите.
Во таа траорна тишина, се слушна прашањето на една мајка: „Едно прашање, кој го уби мојот ангел, кој го уби мојот херој, кој ги пеплоса тие ангелски лица?“.
Овие во црнина завиени семејства, нивните најблиски, кочанчани и целата македонска јавност очекува одговор од институциите, од целиот систем.
