– ММС
Вести Македонија

Почна со работа клубот на Кире Лазаров

Првата македонска ракометна лига од оваа натпреварувачка сезона ќе има уште еден клуб КЛ7. Сржта на овој нов субјект во македонскиот ракомет е составена од млади играчи чии тренер е Андон Бошковски. “Ракомет за секое дете” е мотото на клубот, чиј основач е Кире Лазаров.

-Почнуваме нов проект , ракометен клуб во кој предност ќе дадеме на младите македонски играчи. Ќе поставиме принципи на функционирање , сериозен пристап во работата и она што е најнеопходно за напредок кај младите играчи квалитетен тренажен процес во текот на целата година.Ќе бидеме инкубатор за поголемите клубови, ќе соработуваме со сите македонски клубови за доброто на македонскиот спорт и ракомет, вели Лазаров.

Клубот поставува високи цели за да може, како што вели Лазаров,  да се препознаат карактерните особини на играчите за што подобро селектирање.

-Ќе учествуваме на интернационални турнири со реномирани противници. Нашата цел ќе биде стандарден суперлигаш со таргет млади македонски играчи, најавува нашиот репрезентативец.

Тренажниот процес на ракометарите на КЛ7 е во тек, а првиот официјален натпревар го имаат во средината на септември. До почетокот на првенството КЛ7 ќе одигра повеќе пријателски натпревари со суперлигашки тимови.

Идејата за уште поголема популаризација на ракометот кај децата Лазаров и неговиот тим ја реализираат веќе трета година, преку школите кои работат низ Македонија. Нивното мото е “Ракомет за секое дете”, со цел најдобрите од нив по неколку години да се изборат за своето место во клубот.

Лограње

X

Регистрација