Во Старата скопска чаршија во Даут пашин амам, синоќа, се одржа ноќно снимање за филмот „Збогум Копакабано“ во режија на Милчо Манчевски, во продукција на „Банана филм“. Како што изјави режисерот Манчевски, отпочнувањето со снимање на овој филм претставува еден вид мала победа против филмската мафија, корупцијата и местењето на филмски конкурси, бидејќи, нагласи, две и пол години филмот „Збогум Копакабано“ беше забранет од Агенцијата за филм.
– Многу сум задоволен од снимањето на овој филм, прво со самото тоа што се снима овој филм кој две и пол години беше забранет од Агенцијата за филм од тогашното раководство. Една мала победа во борбата против филмската мафија, против местење на конкурси, корупција, крадење на државни пари, посочи Манчевски. Имаме две правосилни пресуди против Агенцијата за филм и се промени раководството во Агенцијата за филм и верувам дека увидоа дека тоа што го правеа беше незаконски. Судот им кажа дека тоа што го правеа беше незаконски, рече Манчевски.
Вели филмот ќе биде посмешен за разлика од неговите претходни. Како што појасни, се работи за еден вид комедија, но и тажна приказна за брат, сестра и шахта.
– Никогаш не работам со однапред зададена агенда, рече Манчевски, односно задачата ми е да раскажам приказна. Неговиот интерес, вели, се заплетот и луѓето.
– Мене ме интересира заплетот, ме интересираат луѓето. Е сега, работејќи на тоа, кога работиш две, три, пет години кога-како, ако е добар процесот и ако има синергија со соработниците, а овој пат имам феноменални соработници и меѓу глумците и меѓу екипата, вредните работи, темите или ако сакате пораките, сами испливуваат на површината и стануваат и поинтересни и повидливи и порелевантни, рече Манчевски.
Актерот Јордан Симонов во изјава за медиумите истакна дека ова е негова четврта соработка со Манчевски, која како што рече, претставува еден вид врв на нивната соработка.
– Сум работел претходно во „Before the rain“, во „Dust“, во „Сенки“ и сега ова го гледам како еден вид врв на соработката. Секое снимање филм е посебно доживување, тоа носи посебна енергија и магија, а луѓето и актерите кои што работат во него ја чувствуваат таа енергија … Во овој филм имам поголема задача, на пример, втора работа, како да ви кажам, само тоа што имам позначајна задача во филмот, одговорноста е поголема, така што се надевам дека го постигнав она што требаше да се постигне, го доловив ликот на Панче Герамида, еден транзиционен јунак кој ги чувствува сите тешкотии од транзицијата, она што сите го чувствуваме живеејќи во Македонија 30 години, истакна Симонов.
-Еден од ретките сетови каде завршуваме многу брзо, ефикасни сме, целата екипа е прекрасна. Јас ја играм улогата на Малина, комплексна улога која има голем дијапазон на различни емоции. За мене е една од најзначајните улоги, рече Сара.
-Комуникцијт со сите е суер. Сме работелемногу заедно но никогаш енергијата небила толку поврзана ако на овој филм. Повеќе не сум се смеел во ниедна друга подготовска за снимање. Ова е една од сцените во која Виктор и Малина собираат стари железа. Јас сум лице со интелектуална попреченост. Имав сцена кај играв фудбал на 42 степени, па во копачките ми се направи лускавец и во еден момент не можев да издржам од жештината, вели Филип.
