Протераниот тибетански духовен лидер, Далај Лама, денеска навести дека по неговата смрт ќе биде назначен наследникот кој ќе ја продолжи борбата за слобода на Тибет.
Далај Лама денеска им се придружи на илјадници будистички верници на молитвената прослава за одбележување на неговиот 90-ти роденден, настан што одекна многу подалеку од индискиот хималајски град каде што живее со децении.
Облечен во будистичка облека, тибетанскиот духовен лидер се појави меѓу илјадници членови на неговата заедница и поддржувачи кои дојдоа од целиот свет да му се придружат во неговиот манастир Меклеод Ганџ.
„Имам 90 години, но сè уште сум физички во форма“, рече тој, седејќи меѓу своите следбеници. „Во времето што ми преостанува, ќе продолжам да се посветувам колку што е можно повеќе на благосостојбата на другите.“
Далај Лама потоа го даде првиот знак за пораката што долго се очекува за неговиот наследник што самиот ќе ја соопшти во среда, што ќе биде политичкиот врв на целонеделните свечености.
„Затоа ќе постои рамка во рамките на која ќе можеме да разговараме за продолжување на институцијата Далај Лама“, изјави тој.
Иако Далај Лама во последниве години сугерираше дека можеби ќе биде последниот, повеќето Тибетанци се чини дека го поддржуваат продолжувањето на „циклусот на реинкарнација“. Водачот, кој на 6 јули ќе наполни 90 години, и илјадници други Тибетанци живеат во егзил во Индија од 1959 година, кога кинеските трупи насилно го потиснаа востанието во тибетскиот главен град, Ласа.
Харизматичниот добитник на Нобелова награда за мир, со земско име Тензин Гјатсо, на двегодишна возраст стана 14-ти духовен и политички лидер на Тибетанците, соодветно идентификуван, како што бара будистичката традиција, како реинкарнација на неговиот претходник.
„Се молиме искрено за долг живот на Тензин Гјатс, заштитникот на Земјата на снегот, нека живее сто еони“, пееше хор од монаси облечени во црвени одори.
Овој настан има длабоко значење не само за Тибетанците, туку и за бројните верници ширум светот, кои Далај Лама го доживуваат како симбол на ненасилство, сочувство и континуирана борба за зачувување на тибетанскиот културен идентитет под кинеска власт.
Додека Кина го обвинува дека е бунтовник и сепаратист, меѓународно признатиот Далај Лама се опишува себеси како „обичен будистички монах“.
Многу Тибетанци во егзил стравуваат дека Кина ќе именува свој наследник на Далај Лама за дополнително да ја зајакне својата контрола врз Тибет, територија на која испрати војници во 1950 година.
Прославите за неговиот роденден треба да траат до крајот на неделата.
