Обилниот снег и дожд ги затворија патиштата и го прекинаа снабдувањето со електрична енергија во југозападна Швајцарија, соопштија локалните власти, , а дождот предизвикува проблеми и во северна Италија.
Претставник за туризам рече дека Цермат, популарен алпски ски-центар на југот на земјата на границата со Италија, е отсечен. Телевизиската станица СРФ објави дека во регионот паднале 55 сантиметри свеж снег, а 100 сантиметри се забележани на превојот Голем Сент Бернард југозападно од Цермат.
Властите во Ситен, главниот град на кантонот Вале, ги затворија сите патишта за автомобили и пешаци и ги повикаа луѓето да останат дома. Училиштата се затворени. Новинската агенција Keystone-SDA исто така објави прекини поради снег и дожд во кантонот Берн во центарот на земјата.
Властите во Вале, Берн и Тичино издадоа второ највисоко предупредување за лавина , а метеоролошката канцеларија Метео Швајц извести за умерен ризик од високи нивоа на водата на реката Рона и езерото Маџоре на швајцарско-италијанската граница.
Лошите временски услови ќе продолжат и во четврток попладне, прогнозира МетеоШвајц.
Дождовите предизвикуваат проблеми и во северна Италија
Бројни реки во северна Италија се излеаа од коритата по обилните дождови во регионот, а властите ги затворија областите и патиштата во близина на реките . Северо-западниот регион Пиемонт, со главниот град Торино, е силно погоден и упатени се апели до локалното население да остане дома.
Во познатиот ски центар Сестриере, формирана е снежна покривка во висина од 80 сантиметри.
Поплавените пруги предизвикаа големи доцнења во железничкиот сообраќај меѓу Италија и Швајцарија, соопшти италијанската железничка компанија. Неколку возови беа блокирани на таа траса.
