Рудникот има сериозен потенцијал и е најголемиот работодавач во Крива Паланка, од кој живеат многу луѓе, а концесијата за Општината е сериозен извор на финансиски средства. Сепак, еколошкиот инцидент во Крива Река се случи пред очите на целата јавност, додека институциите не реагираа соодветно. Моја обврска е да реагирам, рече градоначалникот на Општина Крива Паланка, Сашко Митовски во емисијата Стадион на Канал 77.
По излевањето на содржината на цевка од Флотација на 14 март, градоначалникот Митовски алармираше на загадување на Крива Река со тешки метали, како цијанид, олово, кадмиум. Од централната власт беше обвинет дека шири паника, додека Државниот инспекторат за заштита на животната средина (ДИЖС) негираше дека концентрациите не тешки метали во водата, особено на цијанидот, се толку големи колку што ги соопшти Митовски. Се случи и политичка пресметка, во која ВМРО ДПМНЕ соопшти дека градоначалникот собира политички поени пред локалните избори на сметка на паниката на граѓаните.
-Најмалку е кампања и тоа дека на сметка на грбот на граѓаните водам кампања. Ниту ми треба мандат ниту шанса за втор мандат. Се’ уште немам донесено одлука дали ќе влезам во изборна трка. Ние ваков инцидент сме имале 2020 и 2021 година, но инспекциските служби си ги имаат преземено сите законски активности и ја имаат известено општината. Мојата реакција е дека има задоцнета реакција кај инспекциите. Државниот инспекторат за заштита на животната средина (ДИЖС) прво информираше дека е технолошка вода, што е апсолутна невистина. Целата јавност гледаше дека во реката течеше нешто како бетон“, изјави Митовски.
Градоначалникот ги негира јавните реакции дека со реакцијата оди против рудникот и рударите. „Булмак 16“ останува најголемиот работодавач во Крива Паланка, а според податоците кои ги изнесе градоначалникот во „Стадион“, годишниот обрат на сопственикот, Мултигруп е 32 милиони евра, од кои 12 милиони евра се добивка.
-Во јавноста се пласира тема и се манипулира за да се навлече гневот кај рударите, ние сме мала општина со лимитирани буџетски капацитети и концесијата од рудникот ни е единствениот посериозен приход. До изминатата година според утврдениот Правилник од Министерството за економија општината добива 2 отсто од прикажаното производство и тој износ е од 300.000 до 500.000 евра. Од оваа година е 4 отсто и се очекува сериозен извор на финансиски средства, кои ќе изнесуваат околу 50 милиони денари или околу 1 милион евра, објасни Митовски.
Градоначалникот на Крива Паланка рече дека проблемот настанал кога институциите не постапиле веднаш, истиот ден државниот еколошки инспектор не земал мостри за да се испита водата, што го направиле општината и риболовното друштво „Мрена“.
Митовски изнесува податок дека рудникот во новата планска документација, со која е запозната и општината, предвидува вложување во нов јаловишен базен. Но, како што рече Митовски, тоа последните 6-7 месеци стагнира и при тоа ја неменува дилемата – зошто стагнира процесот на вложување, а според информациите од рударите новиот менаџмент ги крати трошоците се прават промени во начинот на работа, што се загрижувачко кај вработените.
